وديع العلاوى يكتب: نفسى أضحك

نفسى أضحك من قلبى زى زمان
نفسى غُلبى يتركنى لحظة أنام
نفسى أشوف الدنيا دنيا مش دكان
مش زحمة ولا لحمة بدون أختام
ولا عيش محروق مش للإنسان
أوحتة جبنة تِحِس معمولة بجبس
أو كيلو حليب بسبعة جنيه مغشوش
وكان فى الماضى وأنا راضى بسبعة قروش
نفسى أشوف الدنيا حلوة بالألوان
مفيهاش متسلق ولا متملق جبان
مفيهاش بياع للذمة ع القمة أوتحت
ناسى أبوه اللى الدهر نحته نحت
لاجل يربيه أبيه ويصبح شحط
يخش المجلس ويدعبس ع البخت
قطعة أرض أو يخت أو فيلا جنان
نفسى ما أشوفش ميدان اتشفط
ولا شارع كان واسع داق من العبط
ولا حُفر ولامطبات معمولة غلط
ولا سكة مترو مات بتكسر فى العربيات
ولا رصيف دمه خفيف كله يُفَط
ولا طفل ماشى فرحان يتخبط
م الميكروباصات
نفسى أضحك بس إزاى... إزاى
والدستور فى الباى باى رايح جاى
حزين على حالنا م إحنا بقالنا عام
أو أكتر بنفصل فى المقاسات
أضحك إزاى واحنا بنغرق
فيه حد بيضحك وهو بيغرق
الشعب خلاص يا ناس إتفرق
وطالت بينه وف عينه المسافات
بقينا وسط الدنيا مُسخة
بقينا إحنا والكابوريا نسخة
إحنا كابوريا بنعض فى بعض
كله نفسه يجيب كله الأرض
بنهاجم بعض
بنشتم بعض
بنفضح بعض
طب أضحك إزاى بقى
الضحكة بتطلع بالشقى
بالعافية بالتيله عليله بجد
قولى نكته ولو بايخة
النكته ليه إندثرت
حتى النكته كمان هربت ؟
والا إنتى اللى بقيتى شايخة
معندكيش ضحك ؟
بقى صعب الضحك؟
بقت الضحكة غريبة وعيبة؟
والا خايفة أموت م الضحك؟
يا ستى أموت منا ميت خِلقة
أنا والفرقة
المغلوب على طول الخط
الموت بقى عادى يا بلادى
فى الطرقات - فى المدرجات
الموت بقى مرشوش ع الوشوش
وبقيت مغشوش فى النعوش
فيها واحد والا اتنين
هو الشعب المصرى فين
هو ده الشعب المصرى ؟
أقطع دراعى إن كان هو
واسأل بره واسأل جوه
إن كان هو يبقالك الكلام
دقق كده دقق
بحلق قوى كده واتحقق
مش ممكن أبدا يكون هو
الشعب المصرى كان زمان
أيام ما كان إنسان كله مروًه
كله قوه
دى الوقتى الشعب بقى غلبان
حزنان متفهمش
فرحان متفهمش
كسلان سكران
عيان
كله وارد وجايز
وقول زى ما أنت عايز
الشعب راح فى خبر كان
إزاى بقى أضحك إزاى
نفسى أضحك
نفسى أضحك