يعد محمد إبراهيم كيشو لاعب منتخب المصارعة وبطل الأولمبياد أحد المرشحين بقوة لحصد ميدالية ذهبية فى دورة الألعاب الأولمبية التى تقام بباريس 2024، لتكون ثانى ميدالية أولمبية فى مسيرته، بعد البرونزية التى حققها فى أولمبياد طوكيو 2020.
وحرص "اليوم السابع" على محاورة اللاعب لمعرفة بدايته مع اللعبة، واستعداده للأولمبياد، ومثله الأعلى، وكذلك من يدعمونه ويساندونه، والعروض التى تلقاها للتجنيس.
متى بدأت المصارعة ولماذا اخترت اللعبة بالتحديد؟
وأنا عندى سبع سنين لأنها كانت قدامى فى مركز الشباب، فقررت أن أدخل وخالى حببنى فى اللعبة أكتر.
رد فعل الأسرة؟
كانو داعمين بشكل كبير وشايفين إن أنا ممكن أعمل نتيجة.
مشوارك باختصار من البداية حتى أول بطولة ؟
من البداية كنت بلعب بطولات محلية وجمهورية برونزية وفضية وذهبية لحد ما لعبت بطولات دولية كتيرة الحمد لله.
فاكر أول بطولة حققتها والمكافأة كانت كام ؟
كان عندى تسع سنين بطولة تنشيطية جبت فيها أول ومكنش عليها مكافأة، وأول بطولة دولية أشارك فيها كانت بطولة أفريقيا فى 2014، وكانت مكافآتها 4 آلاف جنيه.
إيه الرياضة اللى بتمارسها وقت فراغك غير المصارعة ؟
تنس الطاولة.
مثلك الأعلى فى اللعبة ؟
كرم جابر ومحمد عبد الفتاح بوجى.
نظامك الغذائى؟
عبارة عن أكل طول اليوم لحد آخر وجبة الساعة الثامنة، وفقا لبرنامج من الدكتور.
صعوبات واجهتك لتحقيق ميدالية الأولمبياد؟
الإعداد بتاعى مكنش كافى وقلة المعسكرات بسبب كورونا.
اتغلبت عليها إزاى؟
اتغلبت عليه بالصبر والعزيمة وما استسلمتش للظروف، واشتغلت بالمتاح لحد ما حققت الميدالية الحمد لله.
ماذا بعد الميدالية؟
بالنسبة لى دافع فى البطولات اللى جاية وإن شاء الله دورتين كمان أو تلات دورات فرحة كبيرة بالنسبة لى وبإذن الله هكررها تانى.
ما هوايتك بعيد عن المصارعة؟
بحب التمثيل وفى كذا حد مقتنع بيا.
بتدخل المطبخ؟ وإيه الأكلة اللى بتعرف تعملها؟
طبعا وبعرف أطبخ أرز ومكرونة وبطاطس وبجهز فطار.
الأكلة المفضلة ليك؟
ملوخية بالأرانب.
إيه حكاية اعتزالك اللعبة ؟
مش بفكر فى الموضوع ده خالص ولسة فى بداية المشوار.
هل تلقيت عروض خارجية ؟
جاتلى عروض كتيرة قبل الأولمبياد وبعده بس أنا مكمل إن شاء الله باسم مصر.
ما هو دور الاتحاد فى المعسكرات والتدريبات؟
بصراحة ماكنش ليه أى دور خلال فترة الإعداد، كل التخطيط والتدريب من خلال المدرب والتنفيذ من الرعاة الخاصين بى.
إيه الأمور اللى بتخوفك فى الحياة العامة حيوانات معينة مثلا أو أمور أخرى؟
مش حاسس إن أنا بلعب ومش متأمن عليا ولو حصلى أى حاجة كدة شكرا ماعنديش حاجة تأمن مستقبلى.
ما هى المباراة اللى شعرت إنك قصرت فخسرتها وخسرت البطولة ؟
بعمل اللى عليا فى كل بطولة والتوفيق ده بتاع ربنا وعمرى ما حسيت إن أنا مقصر.
متى نحقق ميداليات ذهب فى الأولمبياد فى لعبة المصارعة؟
إن شاء الله يبقى عندى خطة لحد باريس سنة ونص نبدأ خطة وإعداد كويس ويبقى فى معسكرات نشارك فيها وبإذن الله المكسب ده بتاع ربنا.
من وجهة نظرك هل هناك صاعدين فى اللعبة لهم مستقبل ولا الأمور غامضة ؟
هناك اتنين أو تلاتة من الفريق القومى اللى بتشرف عليه الشباب والرياضة.
تم أضافة تعليقك سوف يظهر بعد المراجعة