بعد إخفاقها فى أولمبياد طوكيو قررت الاعتزال، وبعد أيام قليلة عادت سمر مرة أخرى، وتراجعت عن قرار الاعتزال، وعادت للمشاركة فى بطولة العالم التى أقيمت نهاية 2021، ونجحت فى التتويج بالميدالية البرونزية، ولم تكتفِ سمر بذلك، بل واصلت رحلتها ومسيرتها حتى توجت ببرونزية البحر المتوسط ثم فضية الرانك الدولية.
سمر حمزة بعد الإخفاق فى طوكيو دخلت فى تحد مع ذاتها، وأقسمت فيما بينها أن تعوض ذلك، وهو ما فعلته بالتتويج بالميداليات والوصول إلى المنصات العالمية، حيث توجت ببرونزية وفضية فى بطولة العالم، إضافة إلى تصدرها التصنيف العالمى.
وحرص "اليوم السابع" على محاورة اللاعبة لكشف كواليس وصولها للعالمية و اسباب الاعتزال والرجوع عنه وتفاصيل أخرى فى الحوار التالى:
لاعبة المصارعة
ما شعورك بعد تصدر التصنيف العالمى للمصارعة؟
كل مرة أعمل حاجة أكون أول حد عملها بتكون تطبيق لمقولة مش شرط تكون ناجح الأهم أكون مميز وسط الناس الناجحة، فمش مهم تصدر التصنيف الأهم إنى أول واحدة.
ما الذى يعود على سمر بعد تصدر التصنيف سواء فى البطولات القادمة أو المنافسين فى المباريات؟
بكون على رأس مجموعة تسهل لى مباريات كثيرة فلا أواجه مصنفين مثلى فى أول مباريات.
هل الفوز بفضية بطولة العالم أمر مميز؟
الفضة أهم من أى حاجة فى المصارعة؛ لأن هذه الميدالية تاريخ؛ والتصنيف بيطلع وينزل، لكن الميدالية مش هتتنسى.
لماذا قررتِ الاعتزال بعد الأولمبياد؟ وما الذى جعلك تتراجعين عنه؟
لأنى مريت بفترة إحباط مكنتش حاسة إن الظروف والموقف اللى أنا فيه يخليني أعمل كده، ورجعت علشان أثبت نفسى، وقررت مش هشوف صعوبات ولا مشاكل، وقررت أشتغل لوحدى بدون راعى، علشان أثبت للناس إن مفيش حاجة اسمها ظروف، وأنا لسه قادرة أعمل أكتر من كده.
بطلة المصارعة
ما أصعب مباراة خاضتها سمر فى حياتها؟
أصعب مباراة ماتش قبل نهائي بطولة العالم لأني كسبت في آخر ثوانى، وأكون أول لاعبة تتأهل للنهائي فى تاريخ المصارعة.
من يقف وراء نجاح سمر حمزة ويدعمها؟
سبب نجاحى ناس كتير القوات المسلحة والمدرسة الرياضية العسكرية وجهاز الرياضة العسكرى والوزارة والاتحاد، محدش منهم سابنى، وفوق كل ده الناس كلها عارفة إن مدربى محمد طلبة هو السبب إن فى سمر حمزة موجودة.
ما طموحك بعد فضية العالم وتصدر التصنيف؟
الطموح الفترة اللى جاية هدفى التأهل لبطولة العالم القادمة 2023 عشان كده نسيت كل اللى حققته الفترة اللى فاتت وبأبدأ من جديد.
ما أهم لقب حصلتِ عليه؟
أهم لقب تصدر التصنيف العالمى والاتحاد الدولى لقبنى بصانعة التاريخ.
تم تكريمك أكثر من مرة، ما التكريم الأقرب لقلبك؟
التكريم من الرئيس عبد الفتاح السيسي فى دورة البحر المتوسط الماضية وكذلك تكريم من وزير الدفاع
بطلة العالم
فى الفترة الأخيرة اعتزلت أكتر من لاعبة فى مختلف الألعاب بسبب الارتباك والزواج، ما رأى سمر حمزة؟
اللاعبات شافوا إنهم خلصوا أهدافهم فى الحياة، الحاجة اللى حبوها، ووصلوا القمة فقرروا يشوفوا حياتهم.
هل الزواج والارتباط ممكن يكون سبب فى ترك المصارعة؟
لأ خالص، فيه ناس موجودة، ولو عاوزة آخد الخطوة وأكمل عادى، لكن عاوزة أدى مجهودى وطاقتى لميدالية باريس.
الفوز فى احدى البطولات
متى تقرر سمر الاعتزال وعدم العودة؟
الاعتزال النهائي مش قدامى أنا هاخد خطوة خطوة وبعدين هقرر أعمل إيه.
تنصحى البنات بايه عامة وفى الرياضة خاصة عشان يكونوا بطلات؟
اللى بيحط هدف قدامه مفيش حاجة تقدر توقفه، هيوصل لو مؤمن بإنه هيقدر يوصل.
سمر حمزة
تم أضافة تعليقك سوف يظهر بعد المراجعة