راضى على الطهطاوى يكتب: فوايد الانقطاع الكهربى

اقطع مَيَّه افصل نـور = يزهق شعب يطق يغـور
تمشى الزحمة من حواليـنا = نلقى الدنيا فرح وسرور
نلقى شوارع فاضية هدوء = ونمنع ماس وشرار وشرور
إزاى ويَّانا تعيش متهنى؟! = خلاط تكييف تلاجه تدور
إيه يعنى فرن العيش تتعطل = دى حسابات مش فى المنظور
أو حتى مريض محتاج لمراوح = بندرب فيه على حر قبــور
نجفف لحمة بلاش تجمــيد = وعلاجنا يتلف يبقى عطور
تلميذ بيذاكر مش موضوعنا = يعنى يا سيدى هيكون دكتور؟!
تخفيف أحمال والنية سليمة = بنوفر قرش لكل فاتــــــور
وكمان تتذكر معنى الغارة = تسمع صفارة تروح مستور
والضلمة تجدد مجد قديـم = كلوب وشمعة فانوس بانور
ومن فوايدها النسل يزيد = والنظر بيقوى كإنه نســور
دفايه لبردك مش مطلوبة = اقفل شباك والبس كسـتور
عايز تنوَّر هاتلك دينامـو = كهربة ناشفة جديد مسحـور
دا النور بيزوِّد حبس حرارى = خايفين على بيئة أزون وبحور
تليفون وياك يدور بحجـــارة = وهسخن مكوى بغاز وبابـور
وهشغل بيتى بطاقة شمسية = دا حلم حقيقى ف كل عصور
بيقولوا تخفيف أحمال فى الحر = والحر بيجى فى كل شهـور