مايسة مسعود تكتب: حكومتنا حكومة متعاونة

فى كل بلد شغلانة الحكومة هى مساعدة وأمن المواطن، وتوفير جميع احتياجاته أما فى بلادنا المواطن هو إللى شغال عند الحكومة.. مصر الوحيدة إللى فيها الحكومة بتمص دم المواطن، مصر بلد النيل وبندفع ثمن المياه.

مصر بلد الطاقة وبندفع ثمن الكهرباء، تبقى مصر مساحتها1002000كم2 وعايشين على طرفها تبقى مصر الطبيعة وأنت عايش فى الزبالة وبتدفع حقها ولو مش عاجبك لمها تبقى بلدك بلد الأمن والأمان ومصنفة ثالث دولة فى العالم فى الإجرام أصل الحكومة، يدوب بتحمى نفسها ده غير أنك بقى بتدفع ضرايب لكل حاجة التعليم والصحة والسكن وكسب العمل، والأكل يعنى يا باشا أنت اللى بتصرف عليهم ولما تيجى تطالب بحقك تبقى أنت والمجرم واحد.

ومن مميزات الحكومة عندنا صناعة البلطجة وإهمال أطفال الشوارع وفقدان آدميتهم بدل ما يتم مساعدتهم وتأهيلهم للحياة كباقى الأطفال.

وتعمل الحكومة المصرية على إهلاك الثروة البشرية بالإهمال والعنف والابتزاز وانتهاك حقوق الإنسان وده لو بيعتبروه إنسانا أصلا.

وعندما نتحدث عن الحكومة المصرية فتتحدث عن الشعب الذى ينتهك حقوقه وحرياته بالكامل ولا حياة لمن تنادى ومن إنجازات حكومتنا تحديد لقمتنا كام رغيف فى اليوم ده لو لقيتا.
حكومتنا ليست للتأهيل والتهذيب ولكنها للقهر والتعذيب وفقدان آدميتنا يعنى لازم تطلع منها مريض أو مجرم حكومتنا حكومة متعاونة.