ونفسى فى عيد يجيب وياه
أغانى و فرحة و أمانى
و نفسى أعود كما الأولاد
و نفسى زمان يعود تانى
أنام و هدومى فى حضنى
واقضى الوقفة مستنى
يجينى بسرعة صبح العيد
وأشوف الكل قلبه سعيد
نروح الساحة و نصلى
و دا يبارك و دا يهنى
ونظرة حب من صحبى
بدون و لا كلمة توصلنى
وأزور كل اللى قاطعنى
وأقول يا رب قوينى
ورجعنى
لكلمة حق تجمعنى
بإهلى وناسى وأحبابى
وتطرح خير على بابى
ونفسى فى عيد يجيب وياه
بذور الود من تانى
لا فيه سلفى وإخوانى
ولا ليبرالى علمانى
يجينى حنا ويبارك
وأعزم لوقا ويشارك
فى لمة أهل ع الفتة
ونتجمع ولاد حتة
بيجمعنا وطن واحد
وكله بيعبد الواحد
وندعى كلنا الواحد
يعود تانى علينا العيد
وأشوف الكل قلبه سعيد
ونفسى فى عيد
مظاهر العيد
لا توجد تعليقات على الخبر
تم أضافة تعليقك سوف يظهر بعد المراجعة