العيد فرحة وأجمل فرحة.. وكل سنة وأنتم طيبين ومع بعض معيدين.. وعيد سعيد وخروف جديد!
كنا زمان واحنا صغيرين بنغنى.. بكرة العيد ونعيد وندبحك يا شيخ سيد.. ومكنتش عارف مين شيخ سيد دا اللى هيندبح وهيندبح ليه؟؟، وليه بندبح بنى آدم ؟؟ هو أحنا مش المفروض بندبح خروف أو عجل أو بقرة.. طب ليه نعمل كدا فى البنى آداميين؟، وبعدين بقى لما كبرت فهمت أن أحنا كنا بنسمع غلط وبنغنى غلط وكنا بنكرر الكلام من غير فهم ولا سؤال حتى ولا أى حاجة ( التكرار بيعلم الشطار ..) وعرفت أن المفروض نغنى ونقول: بكرة العيد ونعيد وندبحك ياخروف سيد.. برضو معرفتش سيد دا مين ؟؟ هل دا اسم الخروف سيد مثلا ولا دا خروف عم سيد..؟؟
المهم فى عيد الأضحى مش اسم الخروف ولا نوع الضحية.. المهم أن أحنا نحيى سنة سيدنا محمد ونضحى من أجل أنفسنا وأهلينا والفقراء .. ولابد أن تنطبق شروط الضحية عليها حتى ننال الثواب وننول رضا الله.
لكن يخطئ من يظن أن الضحية وحدها تكفى لنيل الثواب والحسنات.. فما فائدة الضحية مهما غلت وارتفعت قيمتها وأحنا متخاصمين مع أهالينا وأصدقائنا ؟؟، فلن ننال الثواب لأن الله يغفر للجميع فى يوم عرفة وفى هذه الأيام المفترجة ماعدا المتشاحنين والمتخاصمين، فأين الثواب من الضحية العمل الصالح وأحنا فى أنفسنا حقد وغل وحسد وكره؟؟، فين الثواب وأحنا بنزيد فى العداوة والبغضاء؟؟ فين الثواب وأحنا بنخالف تعاليم الإسلام وتعاليم الرسول عليه الصلاة والسلام؟؟
أننتظر من الله الثواب والحسنات وأحنا مبنعملش لا بالقرآن ولا بالسنة؟؟، أننتظر من الله غفران الذنوب وأحنا بنزود فى سيائتنا وأحنا مابنحاولش نقدم الحسنات على السيئات؟
اتقوا الله فى أنفسكم وأهليكم وبلدكم.. اتقوا الله ولا تتباهوا بأعمالكم ولا ضحيتكم وتنسون أخلاقكم وسلوكياتكم.. حبوا بعض.. عيشوا فى سلام.. تصالحوا مع أنفسكم وأهليكم فلن تفيدكم العدواة والبغضاء ولا السلوك السيئ فى شىء.. قولوا لبعض من قلبكم .. كل سنة وأنتم طيبين .. ضحوا وادبحوا وانحروا .. تحابوا وتهادوا .. ولا تنسوا إخوانكم الفقراء .. وعيد سعيد..!!
خروف - صورة أرشيفية
