د. داليا فؤاد تكتب: المسابقة الكبرى

المسابقة الكبيرة.. اشترك واحصل على الجائزة الكبرى

السؤال الأول:

عصام أخد خطيبته شريفة ومشيوا على الكورنيش، شريفة شافت بتاع الترمس قالت: قرطاس يا عصام الله يخليك.. عصام جاب لشريفة قرطاس وهو قرطاس وأول ما بدأوا يقزقزوا لقوا الشطة كتير فى الترمس وكانوا هايطلبوا المطافى من كتر ما كانوا متلهلبين،، سؤالنا هو: مين المسئول عن زيادة الشطة فى قرطاس الترمس؟

1- فلول مبارك 2- مؤامرة خارجية 3- مختل عقليا

إذا عرفت الحل ابعت رسالة فاضية على 0900 أو اتصل برضه على 0900 وكل ما تبعت أكتر وتتصل أكتر مش هتفرق فى حاجة لأنه أصلا مفيش جوايز.


السؤال الثانى:

الإنسان العصرى مابيعملش حاجة صح من نفسه أبدا، لازم تفرض عليه قانون بغرامة علشان يلتزم ويسمع الكلام، يا ترى إيه السبب؟

1- ناس تخاف ما تختشيش

2- ناس تخاف ما تختشيش

3- ناس تخاف ماتختشيش

إذا عرفت الحل، كالعادة لا تبعت ولا تتصل لأن مفيش حد هايرد عليك علشان مفيش جوايز.. أجيبلكم منين يعنى؟

السؤال الثالث:

فكر شوية تكسب، ولا ماتكسبش مش مشكلة ما تفلقناش يعنى.. المهم سؤالنا: هاتعمل إيه لو بلطجى هجم على واحد صاحبك؟

1- تركن بعيد 2- تسقع قلل 3- تتبع نصيحة: عيش ندل تموت مستور

إذا عرفت الحل نفض لنا ولا تبعت رسايل ولا تتصل مش عايزين وجع دماغ

السلام عليكم