"كريم" بدل ما يعمل عرايس لعبة عملها "بنى أدمين"

عروسة صغيرة لا يتعدى طولها 120 سنتيمترًا، ليست مجرد لعبة، ولكنها عروسة تعبر عن الشخصية شكلا وموضوعا، بعد سنوات من البحث عن عمل قد يحقق به شيئا مختلفاً، قرر كريم أن يفكر بطريقة مبتكرة وكانت عروسة تحمل ملامح الشخصية هى نتاج تفكيره الطويل.

يحكى كريم الشاب العشرينى عن تجربته لـ"اليوم السابع" قائلاً "الفكرة جاءتنى أنا وشاهندة شريكتى، كنا عايزين نعمل هدية مميزة للفنان جورج غزال، وبدأنا نفكر فى حاجة مش هتكون موجودة عند أى حد وقلنا هنجيب لعبة ونعدل فى شكلها نعيد تصنيعها وبدأنا نعمل كدة فعلا بس مكناش راضيين عنها فبدأنا نطورها، عملنا أكتر من عينة بخامات مختلفة وبعدين قررنا أنها تكون لعبة كاريكاتير ولما خلصنا عجبتنا وصنعت لنفسى واحدة وقلنا أننا نطلعها للناس عشان اللى بيفكرو فى حاجة مميزة متكنش موجودة غير عند الشخص ده بس".

ينتهى من الحديث مع أحد زبائنه ويتابع "فكرت أنى أكون مختلف شوية يمكن أقدر أحقق نفسى من خلال ده وخصوصا أن مفيش حد عمل الفكرة ديه قبل كده بدل ما أعمل الهدايا التقليدية أو أنى أرسم لحد صورة كاريكاتير قررت أن أنفذ العروسة بملامح الشخص وهذا لقى قبولا عند الكثيرين على الرغم من أن الفكرة لم تنشر بشكل كبير، ولكنها لاقت استحسان لدى الكثيرين، بحاول دلوقتى أنى أطور الفكرة بشكل أكبر، وأصنع عرايس مختلفة تحمل ملامح الشخصية بشكل مبتكر".