بالفيديو.. "السرطان" يحرم صباح من زوجها.. الزوجة خلال إنهاء إجراءات معاش الزوج بمحكمة الأسرة: "كان سندى وهحزن العمر كله على فراقه".. وابنه حسن: " أنا راجل البيت.. وبشتغل ميكانيكى عشان إخواتى يعيشوا"

"كنت بتقطع على حبيبى وسندى وهو بيموت، سابنى مع 3 أولاد مش عارفه هيبقى إيه مصيرهم".. هذه كلمات قالتها الزوجة "صباح" من أمام محكمة الأسرة بزنانيرى أثناء إنهاء إجراءات معاش زوجها.
وأضافت "صباح" تروى مأساتها لـ"اليوم السابع": زوجى كان كل شىء لى فى الحياة، ولكن المرض اللعين فرق بيننا بعد أن أصيب بسرطان الدم فجأة دون أى مقدمات، وقضى 6 أشهر يعانى فى المستشفى بين الحياة والموت".
وتابعت: "عشنا أيام سوداء بسبب الفقر وقله الحيلة لتوفير العلاج وصفائح الدم له، إلى أن أراد الله أن يرحمه ففاضت روحه إلى بارئها وتركنى و3 أولاد دون سند ولا ادرى إى مصير سوف نلاقى".
واستطردت الزوجة قائلة: "هحزن عليه العمر كله.. فالمشكلة اللى بتقابلنى عدم امتلاكنا مصدر رزق وأهل زوجى مش بيسالوا فينا وبحاول أخلص إجراءات المعاش ولكنه غير كافى لأنه كان عامل "على قد حاله "فدخله محدود, والغلاء عمال ياكل فينا مش عارفين هنعيش ازاى".
فيما قالت الابنه "مريم": "أنا عندى 8 سنين وجايه مع ماما عشان القاضى يسالنى على معاش بابا، أنا زعلانه بابا مات وطلع السماء كنت بحبه وكان حنين عليا ربنا يرحمه".

وأضافت الابنة "عزة" 13 سنة: "ماما بتخاف تسبنا لوحدنا فى البيت وباجى معاها كل مرة، والدى مات سابنا وهو صغير كنت بحبه وبموت فيه وبروح معاه المستشفى وبشوفه هو تعبان وقلبى بيتقطع عليه وحشنى جدا".
بينما قال الابن الأكبر "حسن"، 15 سنة: "ماما ملهاش حد أنا الراجل بتاعها دلوقتى , بحاول أساعدها وبشتغل ميكانيكى عشان إخواتى يعرفوا يعيشوا".