افرحى بابنك يا أمى
وادعى لإخواتى الجنود
راح نعيد النصر تاني
راح نغنى ع الحدود
فاكرة يا امه اخويا لما
اتقتل قدام عنينا
جاتله بالغدر الرصاصة
راحت أغلى حاجة لينا
كنتى دايما بتقوليلنا
انتو أغلى الناس عليا
أوعوا يا ولادى تسيبوني
دا أنتو قلبى ونور عنيا
كنت دايما ارد......حاضر
رغم انى كنت عارف
راح حيجى اليوم واسيبك
بعتذر لك ألف مرة
مش حشوفك يا امه تانى
قتلوا ابنك بالخيانة
حطموا كل الأمانى
اوعى تبكى يا أمى لحظة
وادعى ليا بالثبات
واما ابنى حمادة يسأل
اوعى يا امه تقولى مات
لسه واقفة بعيد يا أمي
لسه زعلانة إنى سيبتك
افرحى ده أنا جى أقولك
بكرة ف الجنة ابقى جنبك
ارفعى راسك يا أمي
وافرحى ده ابنك شهيد
حافظى على مصر الأبية
واضحكى ده الضحكة عيد
![بهاء الدين محمد يكتب: فرحة شهيد بهاء الدين محمد يكتب: فرحة شهيد](https://img.youm7.com/large/s92013179297.jpg)
مشاركة
اضف تعليقاً واقرأ تعليقات القراء
مشاركة
لا توجد تعليقات على الخبر
تم أضافة تعليقك سوف يظهر بعد المراجعة