مـــــاركـــــو مــــــلاك يكتب: يا من إليه المشتكى

الحزن على قلبى اتكا..
اصبح خلاص سهل البكا..
صعب الحكى
..والشكوى ليه لو مش اليك
تبقى المذلة مهلكة
والحسبة ليه دايما غلط !؟
دايما بسئ الاختيار
وآخد قرار امشى بنمط
ويا البشر..
ألقى الدروب كدا مربكة
حاسس بشئ شابه الخطر
وقت المطر..
حن الحجر
داب وانفطر
عجب العجاب
قشرة تدوب
فتبان عيوب..
لب النفوس جوة البشر
قلبى انشطر
حاسس كأنى فى معركة
احساس بشئ م الازدواج
نص الحبيب .. نص العدا
وانا ليه كدا ؟!
والحالة صعبة بدون علاج؟
والحب ليه حسب المزاج؟
والسكة ليه عكس المسار ؟
دايما طريقنا فى اعوجاج
والاحتياج ..
أصبح يقاس بالمصلحة
ويارب ليه؟!..
الراحة ليه مش ممكنة؟!
والأمكنة تفتح دولاب الذكريات..
تيجى بحاجات
.. كانت هنا
من أزمنة
يامن اليه المشتكى