محمد عمر يكتب: هبدأ وأصالحَك

لو هنحسِب كل حاجة
الغلَط مش عَندى.. عندَك
بس أنا مش شايفة حاجة
لو بدأت وجيت اصالحَك


إنت فيك روحى وعقلى
لو بتسأل تبقَى مين
يبقى زعلك هو زعلى
مش مهم الغلطة فين


مش هقول إيه يعنى يزعل
مش هطاوع كبريائى
مهما نزعل.. مهما يحصل
حبنا هو اللى باقى


احتمال فى حاجات قديمة
كنت بتشيلها فى قلبك
وان دى اللحظة اللى فيها
انفجر عِندَك وغَضبك


هتعاتبنى.. تحت أمرك
قُوللى على غلطى ولُومنى
بس إوعى يوم فى عمرك
تنسى حبى وتخاصمنى


مش راح ازعل م العتاب
لو تشوف ف عتابى راحة
مش هقول لحظة حِساب
لأ.. هقول لحظة صراحة


لحظة مش هتهون عليّا
وِحنا بينّا خصام وبُعد
أحلى تبقى اللحظة ديّة
وِحنا أحباب جنب بعض


إنت أغلى حاجة ليّا
ممكن أتنازل عشانها
بس روحى تبقى فيّا
ساكنة مرتاحة ف مكانها