وقف الزمن
على قلبى يمكن من زمن
حط الحمولة من الغيوم
ومن الهموم ومن المحن
وعصرنى بين فكّين رحى
وأنا قلبى رافض ينطحن
دفع التمن ...
طعم الوجع
صوت الأنين
لكنه كان رافض يلين
خايف عليكى لتخرجى
من بين ضلوعى المطحونين
م أنا أصلى شايلك ف الوريد
ما اقبلش حاجة تلمسك
حتى الهوا بيتنفسك
والدم ف الشريان يدور
علشان حبيبتى يحرسك
م انتى اللى فيه
وإن دمّى طرطش هتلاقيه
مطرح ما ينزل يرسمك
وعشان كده..
قلبى اللى رافض ينطحن
واقف كما الجبل العفى
عمّال يصارع ف الزمن
عُمره ما يقبل ينقسم
ما هو مين ياروحى تكونى فيه
يقبل ف لحظة ينهزم ؟
لكن قُصادك بنهزم
وافرح كمان بالانهزام
وتلاقى عينى بتبتسم
أصل الهزيمة ف الغرام
بتخلّى قلبى بجناحين
رافع رايات العاشقين
ويلف كل الأمكنة
والأزمنة
طاير يطوف بين جنتين
م أنا قلبى بات عنده يقين
إن الهزيمة ف الغرام
يا حبيبتى دا ...
النصر المبين
