انتى مش لوحدك.. حكايات الستات فى سنة أولى مطبخ ما بين التكسير للحرايق

"حطيت بدل الملح سكر وبدل الدقيق حطيت بودرة صراصير وحلة الرز شاطت".. نماذج لمواقف وطرائف تواجهها الفتيات فى "سنة أولى مطبخ"، وغيرها من المواقف التى تحدث مع أول مرة لدخول الفتيات للمطبخ، ونرصد فى هذا التقرير قصص الستات مع سنة أولى مطبخ.

تقول أسماء محمد، لـ"اليوم السابع": "أول مرة دخلت المطبخ بعد ما اتجوزت قلت اعمل صينية مكرونة بشاميل.. بس نسيت الصينية فى الفرن واتحرقت، وجه جوزى وشافها وقلتله، فاضطرينا نجيب أكل دليفرى من بره، ودى كانت آخر مرة أدخل المطبخ لغاية ما أخدت كورسات فى الطبخ واتعلمت."

ومن جانبها توضح لمياء، "أما دخلت المطبخ أول مرة فى بيت ماما، عملت عصير "آيس شوكليت" وبعد ما حطيت السكر نسيت الملعقة جوه الخلاط وكانت الكارثة الخلاط اتكسر والعصير طرطش فى كل مكان."

أما شيماء أحمد قالت "نفسى راحت للفشار فدخلت عملت فشار ونسيت أحط الغطاء على الحلة، راح وقع فى كل مكان فى المطبخ، وبسرعة قبل ما جوزى يجى خفيت آثار الجريمة بسرعة."

وتحكى شيرين قائلة "مرة جربت أعمل الأكل زى الشيفات فى التليفزيون وجاية بقلب الأكل فى الهواء على النار راح الأكل طار والنار كانت هتولع فى المطبخ والبيت لولا جوزى كان موجود لحق الموقف والحمد لله عدت على خير."

وقالت إيمان، "حطيت البيض المسلوق على النار ونسيته فترة ولقيت الكزرولة اتحرقت واتفحمت والبيض وقع فى كل مكان فى المطبخ."