وقال هانى الناظر فى تدوينة له عبر صفحته الشخصية على "فيس بوك" "السيدات والسادة أعضاء مجلس النواب الجدد مبروك نجاحكم واسمحوا لى أقول لكل واحد من حضراتكم كلمتين من القلب، الأولى إن اللى فات كان الجزء السهل من المشوار والجاى هو الأصعب بكثير والكلمة التانية طويلة شوية، خلى بالك يا سيادة النائب من هنا ورايح من كل حرف وكل لفظ بتقوله تحت القبة وخارجها وكل تصرف واوعى تنسى وتنام فى الجلسة أو تقعد تتكلم فى التليفون أو تقعد تتفرج على الناس وهى بتشترك فى الحوارات، أو تغيب عن الجلسات أو تاكل لب وسودانى أو تمضغ لبان أو تقعد تتكلم مع اللى جنبك وتنسى الحوارات أو تشتم حد أو تغلط فى حد أو تجرى على إمضاء ورا وزير لأن كله بيتصور ويتسجل".
وأضاف "الناظر" فى تدوينته، "خليك فاكر إن أنت دخلت البرلمان علشان تشارك فى سن التشريعات والقوانين ومراقبة أداء الحكومة وتصوب الأخطاء بالورقة والقلم مش بالتكهنات والإشاعات وإنك مسئول عن الشعب وحقوقه، وبتعبر عنه وعن مشاكله وتسعى لحلها، وبفكر حضرتك إن الزمن اتغير والدنيا بقت غير الدنيا وبفكرك إن كل تصرف أو كلمة منك أو صورتك هتكون عنوان بوستات على صفحات الفيس بوك أو أقوال مأثورة على التويتر أو خبر على المواقع الإخبارية بتلف بيوت ونوادى وقهاوى مصر كل يوم بالليل وهيكون عليها تعليقات كثير جداً وسيرتك هتكون على كل لسان لأن من أول النهاردة حياة حضرتك العامة والخاصة أصبحت مش ملكك، وبقت تحت المجهر خللى بالكم جداً واشتغلوا بمنتهى الجدية والأمانة واتقوا الله وراعوا الشعب ومصر".
وتابع الناظر "وآخر نصيحة أقولها لحضراتكم نائبات ونواب واوعوا تنسوها أبدأ حساب الشعب قاسى وصعب".
