"علمنى الشعر حاجات " قصيدة جديدة للشاعر "عبد الله صبرى"

علمنى الشعر حاجات
برا المنهج ع الآخر
شعلقنى فــ كف الكون
وادانى كتابه الساخر
ضيٌّق شوارعها عليّا
وسع ضحك الفجوات
خلانى بعيد ع الشارع
وغريب وسط البهوات
علمنى الشعر العُزلة
وما علمنيش الشِّعر
ركبنى جناح القيمة
فدخلت لوحدى السيما
شفت الأفلام من جوا
فطالبت بفرق الســِّعر
علمنى اكبر بالعافية
وازهد لمعان الزيف
وأجيب للكيف الكافية
وارتاح على حد السيف
علمنى أخفف حلمى
فتخنت وقلت آمين
وصّانى أعرج بالشيلة
ما أعشمشى فــ بنى آدمين
خد منى الشعر حياتى
وادانى قفص عصافير
وخزاين مصر التانية
اللى بشمس وصفافير
وفتحلى بلاد من بابها
من غير نبوت وغفير
علمنى الشعر أتمرجح
بين الواجب والثورة
والبنت تغنى اتعّور
فاقتنع أنها مش عورة
علمنى الشعر حاجات
غالية وما تجيبشى فلوس
علمنى إزاى الشاعر
بيشوف الدنيا كابوس


موضوعات متعلقة..
السودان تسيطر على جوائز "الطيب صالح الأدبية العالمية" ومصر صوت واحد