أنا مصرى وبلدى هى عنوانى..
ورِيقى بِطَعْم نِيلى..
ومكانى حَدُّه شُطآنى..
والتربة سَمْرَا..
وتاريخها يِحْكِى..
حدوته وسِتى شَايْلانى..
على شط تِرْعة..
وقَنَاية واسعة..
أخَطّى حتى عِمْيانِى..
وتحت توتة..
لوَنْت إيدى..
شفايفى حَمْرَا..
والطعم تُقُلْشْ رَبَانِى..
والساقية تروى..
والمَيّه تِجْرِى..
تِلِف لفَة..
أجْرى قُصَادْها..
والبقرة ماشية..
وعَامْلة فيها شَايْفَانى..
والديك يصيح..
الله أكبر..
الفجرْ أذَنْ ..
انهضْ وشَمَّرْ..
صلِّى وأمِّنْ..
دى مَلايَكة..
صاحية سَمْعَانِى..
أركبْ حُمَارتِى..
ولا عَجَلتِى..
عالأرضْ سارحْ..
بين المسَارِحْ..
مَنديلى حَاضِنْ..
آدى عِيْش وجِبنة..
وعُود الوراورْ يكفى جوعى..
أعزقْ بفاسِى..
وأروى بعرقِى..
وعُمْرِى ما أنسَى..
الأرضْ أرضِى..
آكُل وأَكَّلْ..
حتى جاموستى..
وأرجع وأقولك..
يا عم إنتَ..
بُصْ واسمَعْنِى..
انتَ يا جَاحِد ْ..
يا أبو قَلبْ فاسِدْ..
اقتلْ ودمّرْ..
فجَّرْ وكسّرْ..
ازرعْ قَنَابْلَكْ..
ابْقَى قَابلْنى..
أنا أرضِى خِصْبة..
وفَّرْ خَيانتكْ..
وامسحْ رِيَالتكْ..
وبصْ تحتك..
دَارِى كُسوفكْ..
الأرضْ شايلة..
من غِيرْ مَاتِدْرِى..
يا خسارة يابنى..
قتلتْ ابِنى..
ونسيتْ فى لَحْظةْ ..
وبعتَ دَمِّى..
بِدُنيا فانيةْ..
والأرض أرضِى..
ليوم القيامةْ..
هازرَعْ وأرْوِى..
وأصلِّى فَجْرِى..
وأقولْ ياربْ ..
عليك عَشَايا..
بَدَرْتْ حَبِّى..
عليكْ تِخَضَّرْ..
طَلَّعْتْ هَمِّى..
رَيَّحْت قلبِى..
وارجَع وأنادِى..
وبأعْلَى صُوتِى..
دى بلدى هى عنوانى..
صورة أرشيفية
