تامر شاهين يكتب: يوميات صيدلى فى الأرياف.. يا نهار إثوخ

سلامو عليكو
عاملين إيه؟
فى حلقة النهاردة لازم أحكيلكو على اللى حصل فى الساعة الظريفة اللى جمعتنى مع عم خليل خال سليمان والدكتور حفناوى ابن عمه لزم.
فى الأول لما اتصلت بالحاج خليل لقيته بيقول إنه جاى مع الدكتور حفناوى الليلة دى يسهروا معايا فى الصيدلية شوية ,
أنا طبعا رحت باعت سليمان يشترى شاى وبن وحاجة ساقعه كمان ... أنا كدة قدمت السبت و الحد .. لما أشوف بقا
.. بس خليكو شاهدين .
حوالى الساعة 10 بالليل لقيت الحاج خليل داخل عليا فى الصيدلية و معاه الدكتور حفناوى ..
إنتو عارفين المربع ؟ اللى هو طوله زى عرضه ده.. بالظبط كدة الدكتور حفناوى نفس الهيئة بس مربع لابس بدلة وفوق المربع ده فيه كورة كبيرة.. اللى هى دماغه , و مفيش فى الكورة دى كلها شعر غير هو بس شعر حواجبه والدكتور حفناوى قصير شوية وسمين شويتين.

منظر الدكتور ده يا جماعة يخلى العيان أول ما يعرف إن الدكتور حفناوى هو اللى هيكشف عليه هيخف على طول و هيقوم يجرى زى الحصان لغاية ما يوصل بيتهم .. لا بيتهم إيه .. دة هيجرى لغاية ما يوصل كندا إن شاء الله.

أنا : أهلا أهلا يا حاج خليل .. الدنيا نورت و الله
خليل : أهلا يا مراحب يا مراحب إزيك يا داكتور هاشم ؟
حفناوى : الثلام عليكم
لا كدة حرام بقا ... كمان ؟؟ ..ألدغ يا حفناوى ؟
أنا : و عليكم السلام ورحمة الله و بركاته ... دكتور حفناوى ؟
خليل : أهو يا سيدى أنا جيتلك أهو أنا و ابن عمى الداكتور حفناوى نشرب معاك الشاى هنا فى الأجزاخانه
أنا : ده أنتو نورتونى و الله يا حاج .. منور يا د. حفناوى
حفناوى : ده نورك يا دكتور هاشم
ـنا : اتفضلو يا جماعة اقعدوا .. دى فرصة سعيدة أوى
قعدوا قدام المكتب بتاعى فى آخر الصيدلية من جوة و أنا ورا المكتب و بدأ النقاش
حفناوى : جميلة الثيدلية يا د. هاشم ... مبروكة إن شاء الله
أنا : الله يبارك فيك يا دكتور حفناوى.. شاى بقا و لا حاجة ساقعة ؟
حفناوى : أنا بشرب ينثون
آآآآة ح اتشل يا ناس ... يعنى أنت مالقيتش غير الينسون ؟
أنتو متعرفوش أنا شكلى ‘يه دلوقتى .. أنا عمال أضحك من جوة .. يا رب عدى الليلة دى على خير.
أنا : وأنت يا عم خليل ؟
خليل : ينسون برضك و لو يعنى هنتعبك يبقا بلاش خالص يا ضاكتور
انا : لا يا عم خليل مفيش تعب و لا حاجة
كويس اننا فى صيدلية .. كنت ح اجيب له ينسون منين دة .؟
المهم فتحت علبة ينثون .. قصدى ينسون .. أكياس و شغلت الغلاية و عملت الينسون و كل دة و سليمان مجاش ,,
أشوف فيك يوم يا سليمان
انا : اتفضلوا يا جماعة
خليل : تسلم الأيادى يا ضاكتور
حفناوى بزمجرة : تؤ .. .ما بلاش تثلم الأيادى دى بقا يا خليل
خليل : لا مؤاخذة يا ضاكتور .. مخدتش بالى و الله
أنا : إيه بس المشكلة ؟
حفناوى : يا نهار اثوخ ... انت بتثأل إيه المشكلة ؟ مش هى دى الأيادى اللى قتلت ولادى و لا إيه ؟
أنا مش قادر يا اخواننا .. مش قادر .. أنا سمعت كلمة " يا نهار اثوخ " دى و عاوز اضحك و مش عارف و عاوز أرد عليه و مش عارف و حاسس إن أنا لوفتحت بقى ح انفجر من الضحك
المهم جمعت نفسى من تانى و كتمت الضحك الكتير اللى كان هيملا المكان و يغرقنا جوة الصيدلية دة
أنا : يا دكتور حفناوى .. هو يعنى إحنا هنلغى من حياتنا الكلمة دى علشان اغنية يعنى و الكلام دة ؟
حفناوى : آة يا ثيدى نلغيها .. , إيه يعنى ؟ مش مهم ... بناقث الجملة دى خالث
الجو اتكهرب يا جماعة .. اعمل فى الموقف دة ايه ؟
حفناوى : دكتور هاشم .. بقولك ايه ؟؟ انت انتماءاتك ايه ؟
انا : انتماءاتى .؟؟؟ انا مصرى يا دكتور ؟
حفناوى : ما كلنا مثريين .. انا قثدى انت عاجبك اللى بيحثل فى البلد دة و الانقلاب العثكرى ؟
آآآآه ... كدة بقا حفناوى هيدخلنى فى حارة سد .
أنا : شوف يا دكتور حفناوى .. أنا مبحبش الكلام فى السياسة كل واحد ليه رأى و خلاص و لا أنا ح احجر على رأيك و لا إنت ح تحجر على رأى حد .
حفناوى بصوت عالى : مين قال كدة ؟ .. أنا ممكن احجر على رأيك طالما رأيك دة هيودينا فى ثتين داهية
خليل : استهدى بالله يا دكتور حفناوى .. انت بس زعلته ليه يا د هاشم ؟
أنا : نعم ؟ انا اللى زعلته ؟ مش إنت اللى قلت تسلم الايادى ؟
حفناوى : يا نهار اثوخ ... برضو هيقوللى تانى تثلم الايادى ؟
أنا : يا دكتور حفناوى يعنى أعمل إيه بس ؟ ..بص بلاش خالص الكلمة دى خلينا نتكلم فى موضوع تانى
حفناوى : آة ماشى ... أحثن .
فى نفس لحظة الصمت دى يا جماعة ظهرت المذيعة فى التليفزيون و أعلنت خبر حبس محمد مرسى 20 سنة
ما أقولكوش بقا على اللى حصل لحفناوى ,, شكله اتغير .. وشه احمر .. اتنفخ .. ودانه احمرت جدا شفايفه ازرقت جدا .. عينيه برقت جامد جدا جدا ,, الراجل دة أكيد هيتحول دلوقتى
حفناوى بصوت عالى جدا : حرام عليكو .. حرام عليكو .. انتو عاوزين مننا ايييه ..؟ نهاجر و نثيبهالكو و لا نعمل ايييه ؟
أنا : اهدا يا دكتور حفناوى .. إن شاء الله اكيد المحامين مش هيسكتوا
حفناوى و هو بيخبط بايديه الاتنين على دماغه : محدش يقوللى اهدا .. أنا جايلك .. جايلك يا عم مورثى ....جايلك يا ثيد الناث
حفناوى قال الجملة اللى فاتت دى و طلع جرى من الصيدلية على برة
انا : الحقه يا عم خليل لا يعمل فى نفسه حاجة
خليل طلع جرى وراه علشان يهديه فى نفس اللحظة اللى دخل فيها سليمان معاه الشاى و البن و الحاجة الساقعة
سلميان , و هو مفزوع : فيه إيه يا دكتور هاشم ؟ هى الناس بتجرى كدة ليه ؟
أنا : أنت جيت يا سليمان .؟ ما لسة بدرى .. اقفل يا ابنى الصيدلية كفاية كدة النهاردة
شفتوا بقا أنا حظى عامل إزاى . ؟
بس ان شاء الله مسيرها تتعدل
بس يا نهار اثوخ لو ما اتعدلتش ..
يا نهار اثوخ .... ح اعمل ايه ساعتها ؟
استر يارب
ياللا .. اشوفكو بقا فى الحلقة الجاية
دمتم بخير
سلامو عليكو