بالفيديو.. مأساة العمة فتحية بنجع العرب بسوهاج .. زوجها توفى من 27عاما.. وبناتها الأربعة معاقات .. الأم: "تعبت من الشحاتة على علاج بناتى واداينت لطوب الأرض.. وبنتى كانت هتنتحر علشان تستريح من الألم

ظروف قاسية وتحدٍّ للزمن ومصاعب ومأساة إنسانية تعيشها أسرة بسيطة بمحافظة سوهاج، حيث اجتمع الفقر والعجز والمرض عليها‏، ووقفت مكتوفة الأيدى، شاردة الفكر قليلة الحيلة أمام تحدى الزمن لها.

4 فتيات كلهن معاقات حركيا ويفقدن الكلام

أسرة الست "فتحية" التى تعيش بنجع العرب بدائرة مركز طما والتى توفى العائل الوحيد لأسرتها وترك لها أربع بنات "أمل وراوية وصباح وشادية"، فى سن الشباب كلهن معاقات حركيا بالإضافة إلى فقدهن النطق، ولم يتبق لهن إلا الله وأصحاب القلوب الرحيمة التى تغمرهم بقليل من العطف والشفقة والتضرع بالدعاء، تنتظر من حكومة المهندس إبراهيم محلب أن تضمهم لمنظومة الرعاية الصحية التى تنادى بها الدولة.

منزل الأسرة مسقوف بالبوص وألواح الخشب وفراشهم حصير

"اليوم السابع" انتقل إلى مكان إقامة الأسرة المتواضع البسيط، فوجدناهم يعيشون فى مسكن قديم سقفه من البوص وألواح الخشب وفراشهم من حصير بلاستيك، كل شىء بالمنزل متهالك وغير آدمى ويحمل فى طياته جميع أشكال المرض.

الأم: "بناتى كلهم معاقين وبستلف فلوس من طوب الأرض"

فى البداية تقول "فتحية سلمى" أرملة: تعبت ومش عارفة أعمل إيه ومرضت من الغلب، هاعمل إيه لكن ربنا موجود بناتى الأربعة كلهم معاقين ومحتاجين علاج وبستلف فلوس من طوب الأرض، وعلشان تاخذنا السيارة بهم المستشفى بتاخد 200 جنيه.

الأم: مش قادرة أعالج شادية وبتعمل حمام على نفسها

تابعت، شادية عندها ورم بالحوض أخذتها مستشفى أسيوط، وتم حجزنا لمدة شهر كامل صرفنا خلاله 1000 جنيه كل شوية يقولوا لنا بكرة هانعمل العملية ليها، وبعد ذلك قالوا العملية مش هاتتعمل، فطلبت منهم الخروج ورجعت بها مرة أخرى وحالتها كل يوم فى الأسوأ لدرجة أنها بتعمل حمام على نفسها والعلاج مش جايب نتيجة.

بنتى حاولت الانتحار من الألم والعلاج بجيبه وأنا مديونة

وقالت: "فى يوم شادية جابت زجاجة سم وقالت لى هاخدها علشان أموت واتخلص من الألم، لأنها طول الليل تصرخ من شدته وكمان هى حاسة أن الحمل عليا بقى ثقيل خالص والعلاج بجيبه بالدين من الصيدليات وبالسلف من طوب الأرض، وأنا بناشد الرئيس السيسى أنه يتدخل لعلاج شادية أولا، لأن حالتها كل يوم بتدهور أكثر وأكثر.

آكل ولا أعالج عيالى منين زوجى وابنى الكبير توفى نروح لمين

أما حكاية "أمل وراوية وصباح" فهى حكاية ثانية "صباح" عندها شلل أطفال "وراوية" عندها مرض فى أقدامها ومش قادرة تمشى، أما "أمل جالها دور سخونة وبعدها فقدت النطق تماما زى أخواتها الثلاثة وكلهن يحتجن إلى رعاية طبية مستمرة وعلاج مستمر، وأنا مش معايا، متسائله آكلهم ولا أعالجهم منين والعائل الوحيد لينا توفى من 27 سنة وبعديه ابنى الكبير توفى ومبقاش لينا غير ابن واحد على الأربع بنات مش قادر يكفى احتياجتنا أنا وأخواته واحتياجات زوجته نروح لمين اللى بيدينا النهاردة ويعطف علينا مش بيدينا بكرة".

تعبت من الشحاتة على علاجى وعلاج بناتى وعيشتنا مايرضاش بيها الحيوانات
أنا تعبت من الشحاتة من الناس علشان علاج بناتى وعلاج نفسى، ياريت الحكومة تسقف ليه البيت، المطر جاى وحر الصيف صعب، لأننا ساكنين بالقرب من الجبل، عيشتنا ترفضها الحيوانات، ومحتاجة من وزير الصحة أن يعمل لبناتى الأربعة تأمين صحى علشان يقدروا يحصلوا على العلاج باستمرار ومحتاجة معاش يكفى احتياجاتهم.

ونادت وهى تصرخ "ياحكومة الفقر يحاصرنى من كل مكان، والديون تراكمت ومرض بناتى الذين توقفوا عن العلاج لعدم قدرتى على شراء الأدوية زاد حالتهم سوءا‏ مين هايساعدنى فيكى يا حكومة، بقول للرئيس عبدالفتاح السيسى ينقذنى وينقذ بناتى الأربعة المعاقات من المرض.