دعاء عبد الله تكتب: الواد البحبوح

لما تبقى حياتك فاضية ومهوية
ومعندكش لا رأى وفكرة أو حتى قضية
داير تخبط ع البيبان وتقول فين هى؟
حياتى سرقتنى واتسرقت من غير حرامية
غابت ورا غيوم الشتا والمطرة أهى جاية
تنزل على سطح البيوت تلمسنى يطلع صوت على راس أبويا وجفون عينيه
تغسل خبايا الروح ولا تعرى جروح
كده أو كده أنا نفسى أبوح
مهو أصلى فاض بيا ويا روح ما بعدك روح
مبقتش قادر على تقل الواد البحبوح
اللى مرسوم بالقلم على وشى وملازمنى فين ما أروح
بيضحكنى على كيفه
ويزعلنى على كيفه
ومقيدنى تكتيفه
خلاص يا عم اتلم...أنا واحد تقيل الدم
راكبنى مليون هم
لم ألوانك وامشى...وشى ملاه السم
مش هضحك على كيفك
ولا هزعل على كيفك
كرهت انا طيفك
لا أنا نحنوح ولا بحبوح
أنا كبيرى واحد مجروح
كل مناه فى الدنيا عن همه فى مره يبوح