د.هانى العسلى يكتب: وعسى أن تكرهوا شيئا وهو خير لكم

فعلا دة حقيقى، احنا عدينا بأربع سنين فى منتهى الصعوبة بداية من ثورة أحداث يناير ثم فترة نجومية النشطاء ثم كبوة الإخوان حتى وصلنا ليوم زى النهاردة اللى بقى عندنا زعيم زى الرئيس السيسى الذى يصنع مستقبلا جديدا ويضع مصر فى المكانة التى تستحقها على الخريطة العالمية.

أيوة لولا الأيام السودا اللى عشناها مكناش حسينا بطعم اليوم ده، لو مشفناش مساوئ الإخوان ومشروع نهضتهم مكناش عرفنا معنى الاتفاقات الدولية الاقتصادية المحترمة، لو مكناش شفنا سخرية دول العالم من أيام مرسى مكناش قدرنا احترام العالم للسيسى، لو مكناش سمعنا الخاطفين والمخطوفين مكناش عرفنا معنى الثأر لشهدائنا لما السيسى دك داعش فى ليبيا، لو مكناش سمعنا كذب وخطب مرسى مكناش حسينا صدق السيسى، لو مكناش شفنا تلون مواقف النخبة مكناش عرفنا يعنى اية القائد وجرينا عليه التفينا حوله، لو مكناش شفنا عدم صمود البرادعى مكناش عرفنا يعنى اية واحد بيحب بلدة استلمها و هى شبه معزولة عن العالم و الكل متربص بيها و قدر فى أقل من سنة يحطها على الخريطة العالمية و يخلى العالم يعترف بيها كدولة صاعدة، من الآخر مكناش عدينا الطريق إلى إيجاد زعيم بجد.

طبعا الكلام دة للمصريين اللى بجد . مفيش حياد فى حب مصر . تحيا مصر و ستحيا بإذن الله تعالى.