سألنا المصريين هتعملوا إيه بـ20 يوم زيادة فى الكوكب الجديد.. عايزين ننام

بشرى سارة حملها الكوكب الجديد "كيبلر" للأشخاص المشغولين دائمًا الذين يحلمون بأن يكون اليوم 60 ساعة وتزيد أيام الأسبوع كى يتمكنوا من إيجاد وقت لنجاز كل المهام المطلوبة منهم، فقد كشفت وكالة الفضاء الأمريكية "ناسا"، أن العام فى الكوكب الجديد يبلغ 385 يومًا وليس 365 يومًا مثل كوكب الأرض، فسألنا المصريين ماذا تفعل بالعشرين يوم الإضافية إذا انتقلت للكوكب الجديد؟

فرصة للقراءة

رأى "أحمد سو" مهندس الديكور الثلاثينى فى العشرين يومًا الإضافية فرصة لقراءة كل الكتب والروايات التى لم يجد وقتًا لإنجازها، ويقول "هقرأ فيهم أى قصص أو روايات جديدة.. لأن أيام الإجازات هنا لما الواحد بيشتغل بتقتصر على الأعياد.. والأعياد بتبقى أغلبها زيارات وخروجات وفسح والواحد مابيلحقش يقرأ الحاجات اللى هو بيحبها".

النوم

أما هشام طارق فيقول "هحطهم مع الأيام الزيادة اللى عندى أصلا اللى مش بشتغل فيهم أو بعمل أى حاجة وأكمل نوم".

السفر

بعد سؤال متشكك عن هذه الأيام هل ستكون إجازة من العمل أم أيام عمل رسمية، قال "عمرو المصرى” إنه يتمنى أن تكون هذه الأيام إجازة يقضيها فى السفر مع الأصدقاء أو زوجته.

إجازة

أما "نسمة مجدى” فتتمنى لو تكون هذه الأيام العشرون إجازة، وتقول "ياريت يسيبونا فيهم نمارس هواية أو ناخذهم إجازة، أو نستغل العشرين يوم فى إصلاح ما أفسدناه طول السنة مثلا، ونشوف مثلاً ناس بتعزف للكوكب كله موسيقى عشان يصلحوا أعصاب السكان".

شغل إضافى

نظرًا لأنه شاب حديث التخرج ومقبل على الزواج اختار "أحمد سمير الشيخ" أن يقضى العشرين يومًا الإضافية فى "شيفت ليلى” فى أى مكان ليتمكن من تغطية تكاليف الزواج، ويقول "والله نفسى اليوم يبقى أكتر من 24 ساعة عشان أشتغل فيهم".

ممارسة الهوايات

بنظرة حالمة تتمنى "سمر على” أن يتم تخصيص العشرين يومًا الإضافية لممارسة الهوايات، وتقول "هخصصهم لكل الهوايات اللى كنت بحبها وأنا صغيرة ومابقاش لها وقت ولا مكان دلوقتى هقضيها بين رسم وعزف وسفر لأماكن جديد، بس المهم يبقوا إجازة، ولوحدى تمامًا".