د. صبرى إسماعيل يكتب: يا حَرّ أغسطس

الأحد، 16 أغسطس 2015 02:00 م

صورة أرشيفية

اضف تعليقاً واقرأ تعليقات القراء

ياحرّ أغسطس كفاية عرق
سعادتك بترقص وإحنا فى قلق
ماهمّك آلامنا ولا اللى اتحرق
ولا اللى بمزارع يعانى الشقا
يا حرّ أغسطس كفاية بقا
******
ياحرّ أغسطس كفاية عناد
وفضلا تراعى ظروف الولاد
وترحم بلادى وكل البلاد
وهنشيل جميلك لحين اللقا
يا حرّ أغسطس كفاية بقا
*****
لانافع مراوح ولا فتح باب
وخفت المكيّف يزيد الصعاب
وحتى المصايف ديونها هباب
وناس فى مارينا وناس معرّقة
يا حرّ أغسطس كفاية بقا
*****
عشان الغلابة بكفر ومدينة
وكل اللى يحرس وإيده أمينة
وكل الصحارى وأهلى فى سينا
وكل اللى نفسه البلاد ترتقى
يا حرّ أغسطس كفاية بقا