"آخر قصيدة شعر هاكتبها" قصيدة جديدة لـ"عبد الله صبرى"

آخر قصيدة شعر هاكتبها
للقلقانين ع الشط والمركب
والعطشانين من كتر شرب الخوف
لعيال هتيجى بعدنا ... بتشوف
وبتلتزم بالفوضى والمسافات
تفهم وتكشف أى تعلب فات
وتلففه مش تشتغل لفات
آخر قصيدة شِعر يا محمد
ليك انت واللى هيفضلوا صحابك
إرجعلها لو أى شئ صابَك
هتشوفنى باضحك لما هتنادي
ما تقولشى بابا قول يا عبدالله
علشان ما احسش انك اتغيَّرت
وانك كبرت شوية واتحيَّرت
قولها لحبيبتك وانتو ع الكورنيش
لو كان هيفضل عندنا كورنيش
خالف كلام امك لكن بشويش
وادخل معارك بس من غير جيش
واكسب رضا واخسر رغيف العيش
آخر قصيدة شعر هاكتبها
لصحاب كتير يتلاقو فى التليفون
ويعلموك ان البعاد راحة
وايدين فى أنقى حالاتها جراحة
للشعر لما خطفنى من روحي
للحلم لما اتسلى بجروحي
للطيبين اللى شافونا جزم
لما خالفنا الباشا ويا الشيخ
للزهقانين اللى فى شرم الشيخ
شكرا لكل مدينة طردتنا
شكرا لكل سفينة نسيتنا
شكرا لكل بداية أنهتنا
شكراً لأهالينا اللى شتمونا
شكراً لسيخ خاف يجرح المونا
شكراً لكل وساخة التفاصيل
شكراً لزيف الجهد والتحصيل
والشكل لما اتغابى ع المعنى
آخر قصيدة شعر باكتبها
لقلوب جميلة كات بتسمعنا
للفرق بين "هتساعنا " و " اشمعنى "
للنازفين ع الأرض والسماوات
لوشوش بتضحك بس روحها موات
للزقزقة بالعند فى الساكتين
للتين والزيتون والفجر / الضُحى
للغلب والتعب المقيم والرحرحة
للأضرحة
لكلام كتير قلته وانا تحت الرحى
مشوار خفيف الوقت أتقل م الهرَم
مشوار شفيف الوجد بطفولة وهرَم
مشوار وكان يلزمله كام لحظة كرَم
يمكن تكون البهجة عدت جنبنا
واحنا اللى كنا وقتها متنكرين
على كل حال متشكرين
متشكرين
متشكرين