سايبلك ميراثك فى صندوق خشب
شوية ورق وساعة وقلم
ونضارة باغ وحلم وعلم
ودول عند أبوك سبايك دهب
مسبتش كنوز ياولدى ياسين
أبوك أصله فقرى من الطيبين
لا بركع لقرش ولا اسجد لجاه
وبيروح كل زادى لوجه الإله
من بين حاجاتى سايبلك قلم
حق وعدالة وصوت ما انكتم
صوط بيلسع فى ندل وجبان
أما الأمين يكون له الأمان
ونضارة باغ دابت قراية
قريت 100 كتاب قريت 100 حكاية
سايبلك علم ومرفوعة هامته
حياتك حايته كرامتك كرامته
مشوار حياتى فى حضنك داريه
وفيه سطر فاضى كمل عليه
لو بين سطورى سطر اتحبس
ومن بين ضلوعى سايبلك نفس
ياولدى ياسين
رجل يتحدث مع ابنه - أرشيفية
لا توجد تعليقات على الخبر
تم أضافة تعليقك سوف يظهر بعد المراجعة