فى جولة وزير النقل بمحطة مصر.. الجيوشى يقبل رأس مسن.. ويقول لمواطن: العاملون بالقطار شغالين عندك وفى خدمتك.. ويؤكد لعاملة نظافة: "لو اشتغلنا كويس الدنيا هتبقى حلوة"

قام المهندس سعد الجيوشى وزير النقل، بجولة داخل محطة مصر برمسيس، لمتابعة نتائج توصياته لقيادات الوزارة وهيئة السكك الحديدية بالاهتمام بأعمال التطوير والتنظيف، بالتزامن مع بدء إجازة عيد الأضحى المبارك، وفور دخوله على أحد أرصفة قطارات الصعيد قال له العمال: فين الأجور ياريس .. عايزين نروح للعيال".


وأثناءالجولة أجرى وزير النقل حوارا مع عاملة نظافة، وأكد لها أن اهتمامها بعملها سينعكس على المحطة كلها، وأن عملها مهم قائلا "لو اشتغلنا كويس الدنيا هتبقى حلوة". وأجرى حوارات مع بعض المسافرين والعاملين للاطمئنان على مستوى الخدمة.


وفى السياق نفسه، استوقف أحد المواطنين المهندس سعد الجيوشى، وزير النقل، ليذهب معه لمكتب حجز تذاكر قطارات الوجه القبلى، بعد أن رفض الموظف إعطاءه تذكرة وتعامل معه بشكل غير لائق. من جانبه، تحدث الوزير للموظف ورئيس المكتب قائلا، "كل ما هتتعب أكتر ربنا هيكرمم أكتر وأنا شايف تعبكم وعايز أكتر".


من جانبه، طالب الدكتور سعد الجيوشى، وزير النقل، بتحويل كوبرى المشاة المعدنى، الموجود أعلى رصيف قطارات وجه قبلى، لمنظر جمالى لإراحة عين المواطن مع الاهتمام بمستوى الخدمة. ورد الوزير على مواطن، علق على زيارة الوزير بقوله، بعد المسئول ما بيمشى مش بيبقى فيه نظافة، قائلا، أنا جيت النهاردة بعد 4 أيام من آخر زيارة عشان أشوف المحطة نظيفة.


واشتكى آخر على رصيف محطة فروع قبلى من عدم وجود عربات قطارات بعد الساعة السابعة مساء، فرد الوزير قائلا، "الناس مش بتخاف على فلوسها، والمفروض لما تشوف حد بيخلع لمبة أو يبوظ كرسى متسبوش وعليك أن تبلغ لأن ده بفلوسك والعاملين فى القطار والمحطة شغالين عندك وفى خدمتك".


ومن ضمن المشاهدات كان هناك عامل نظافة يسير فى الأماكن التى كان مقررا أن يتجول فيها الوزير وخاصة الممرات والطرق المؤدية إلى رصيف فروع وجه قبلى الخاص بقطارات الصعيد، ليقوم العامل برش الطرق بمعطر على الأرض برائحة التفاح، ما دفع أحد المواطنين للتأكيد للوزير "ديما بعد زيارة كل مسئول بنشوف الدنيا بتتظبط وبعد ما يمشى ترجع الدنيا بايظة تانى".


وفى نهاية الجولة، قام رجل مسن كان يرتدى جلابية بيضاء، بمحاولة تقبيل يد وزير النقل المهندس سعد الجيوشى، وذلك عقب استجابة الوزير لطلبات المواطن ما دفع المسن إلى التوجه إلى الوزير محاولا تقبيل يده إلا أن الوزير سارع بتقبيل رأسه وانصرف مسرعا وسط دعاء الرجل له قائلا: "ربنا يبارك لك ويحميك ويقويك ويخليك للبلد دى".