سهام ميلاد تكتب: ابدأ بنفسك.. "2"

إحنا طبعا عارفين أن فى سلوكيات كتيرة هى السبب فى تأخر بلدنا ولازم نتخلص من هذه السلوكيات السلبية التى تعرقل تقدم بلدنا الحبيبة واستعرضنا سابقا وتكلمنا عن الاستهتار.. والآن نستعرض بعض من السلوكيات السلبية التى لا نحب أن نراها ونتمنى أن تختفى من بلادنا مثل (الفوضى وعدم الالتزام) وطبعا عشان نتخلص منها بنناشد كل فرد وبنقوله ابدأ بنفسك.. فمقوله ابدأ بنفسك ليست غريبة لأنها ذكرت فى القرآن الكريم والإنجيل.. فمن أقوال سيدنا محمد صلى الله عليه وسلم قال (من رأى منكم منكرا فليغيره) بمعنى أن لو حد منكم شاف شىء مكروه ومرفوض فليغيره بنفسه وطبعا كلنا كارهين ورافضين هذه السلوكيات إنها تكون فى بلدنا وصدقونى كل واحد فينا قادر أن هو يعمل حاجة ولو صغيرة ولو كل واحد بدأ فى تغيير شىء تتغير أشياء كثيرة ونخلى بلدنا أحلى لأن مشوار الألف ميل يبدأ بخطوة وطوبة على طوبة تبنى عمارة وإحنا مش عايزين بس نبنى عمارة دا إحنا عايزين نعيد بناء أساسات لبلدنا اللى كانت على أعتاب الانهيار.

ودى مش أى بلد دى مصر يعنى (أقدم حضارة) يعنى إحنا محتاجين كل الأيادى تبقى معانا حتى أيادى أطفالنا الصغار.. بكفه الصغير يقدر يغير ويعمل حاجة ويتعلم منو طفل زيه ونبقى زرعنا فيهم سلوك إيجابى ويحبوا بلدهم ويخافوا عليها.. وياريت بقى نتخلى عن السلبية واللامبالاة وننسى جملة (هو أنا يعنى اللى هغير الكون) وأنا بقولك آه أنت وأنا وهى وهو كلنا مع بعض نقدر علشان بنحب مصر بلدنا هنعمل المستحيل ونخليها أحلى بلد فى الدنيا.

ونتمنى نقدر ننهى على الفوضى اللى ساكنه بلدنا فى كل شىء سواء فى الشوارع والمرور والمستشفيات والمصالح الحكومية... الفوضى دى أكتر حاجة لازم نحاربها ونتخلص منها والسيف اللى هنحارب بيه الفوضى هو النظام والالتزام وعلينا جميعا أن نحمل هذا السيف ومن أبسط الأمثلة: البيت المصرى لما يبقى منظم ومرتب ونظيف وخصوصا أكتر مكان بتتواجد فيه ست البيت وهو المطبخ لما يكون مترتب ونظيف وكل شىء فى مكانه أد إيه دا بيساعدها على إنجاز شغلها فى أسرع وأقل وقت وبراحة نفسية بعكس لو كان يقلب يعدل وكل حاجة تدور عليها عشان تستعملها ودا طبعا هيأخرها فى إنجاز شغلها ويوترها.. ولو طبقنا هذا المثل على كل شىء فى بلدنا هنلاقى كل حاجة مش بتخلص فى سنتها ودا غير تضييع الوقت وتعطيل مصالح المواطنين وكمان فى وسط الفوضى والإهمال فى بعض المصالح الحكومية فى ملفات وأوراق مهمة بتضيع؛ طب إيه الحل وممكن نعمل إيه.

أقولك.. لو فى واحد بيحب بلده وخايف على مصالح الناس وبيحب شغله يبدأ بنفسوا ويلم معاه زملاءه فى العمل وياريت معاهم برضو عمال نظافة ويروحوا يرتبوا المكاتب ودولايب الملفات ويتم تنظيف وترتيب المكان.. أكيد هتفرق معاهم لما يجوا يشتغلوا هيلاقوا أنهم بينجزوا أعمالهم أكتر ومصالح الناس بتخلص بسرعة بدون الجملة الشهيرة (تعالى بكرة) فاكرين زمان لما كنا بنزوق ونرتب مدرستنا فيها إيه لو عملنا كده فى أشغالنا كمان وكله للخير، وكلو كوم وفوضى المرور دى كوم تانى دا من كتر الزحمة وخنقة المرور مبقناش نخرج واتعقدنا من الخروج ونسينا حاجة اسمها فسحة يوم الإجازة لكن برضو فى مشاوير لازم نعملها وتخيل بقى المشوار ممكن ياخد منك اليوم كله وهو اصلا يخلص فى ساعة بس طبعا من غير الزحمة والفوضى وطبعا دا بيضيع منك وقت ع الفاضى وتبقى تعبان ومتعصب ودا برضو بيوصلك انك تبقى غير قادر انك تلتزم بمواعيدك لأن الفوضى بتوصل لعدم الالتزام سواء الالتزام بمواعيد العمل أو الالتزام فى إنجاز العمل نفسه والحل بسيط وسهل.

ياريت كل واحد يلتزم بقواعد المرور وتلتزم بالحاره المرورية إلى انت ماشى فيها لكن منلاقيش حد عامل فيها حدق وماشى عكس الاتجاه حاكم الحدقين كتير.. وياريت الدوله تدعمنا اكتر بالكبارى وانا عارفه وشايفه أن فى إصلاحات وتوسعات فى الطرق لكن مع كثره الزحمه مش كافى وياريت نهتم بمقاطع الطرق إلى بيتقابل فيها أربع اتجاهات أو أربع شوارع نعمل فيها كوبرى صغير يخدم اتجاهين أو شارعين وأسفل الكوبرى يخدم اتجاهين آخرين.

ونرجو الاهتمام بكبارى المشاة لأن عند عبور الشارع الواحد بيحس انه محتاج لأربع عيون وخصوصا فى منطقة وسط البلد وخصوصا برضو عند المدارس التى تقع على شوارع عمومية لكى نحمى أطفالنا من الحوادث وأخيرا بقولك..... ده الوقت المناسب اللى نقدر نعمل فيه كل حاجة لمصر ودا لأن معانا أعظم قائد بيعمل المستحيل علشان خاطرنا وخاطر مصر لكن برضو هو مش ساحر يقدر يعمل كل حاجة لوحدوا... محتاجين كل الأيادى المصرية معانا علشان نخلى مصر جنه بالخير مليانه.. ادى مصر مصر هاتديلك... مد ايدك بالخير الكل هيدعيلك مصر دايما ام الدنيا وبحبكم وخوفكم عليها هتبقى اد الدنيا وعمرنا ماهننسى كمان كلمة قالها قداسه البابا شنودة زمان عن مصر (مصر ليست وطن نعيش فيه ولكنه وطن يعيش فينا ) معا بلدنا احلى بس المهم ابدأ بنفسك.