بالفيديو.. الأسطى "أم ياسمين".. ربة منزل برتبة سائق "ميكروباص" على خط الهرم: "عندى ثلاثة أولاد وبشتغل عشان أساعد جوزى.. ونفسى أسدد قسطها وأطلع عمره وأكمل جهاز بنتى.. وربنا يبعد عننا بتوع هاتى رخصتك"

"أنا عندى ثلاثة أولاد عندى بنت فى رابعة جامعة وولد فى ثالثة ثانوى وبنت فى ثالث إعدادى اشتريت أنا وجوزى عربية "سوزوكى" عشان تساعدنا على المعيشة وجوزى بيشتغل محاسب فى شركة ومعندوش إجازات فاضطريت أشتغل أنا عليها"، بهذه الكلمات بدأت أم ياسمين التى اتجهت لقيادة "ميكروباص" لتساعد زوجها فى مصاريف المنزل حديثها لكاميرا فيديو 7 قناة اليوم السابع المصورة.

وعن بداية عملها على "الميكروباص" الصغير قالت: "كان فى الأول كتير بيعاكسونى وبيضايقونى وكانوا بيكسروا عليا وشباب تركب معايا وتنزل ومتدفعش فلوس لكن دلوقتى تقبلونى واتعرفت إنى سواقة فى خط الهرم والحمد لله بس ربنا يبعد عننا بتوع هاتى رخصتك".



وأضافت: "أنا بشجع الشباب إنهم يعملوا مشاريع بدل ما يكونوا عبء على البلد وعلى الرئيس وبشجع السيدات إنهم يشتغلوا عشان يساعدوا أزواجهم على المعيشة".

وعن أمنية "الأسطى" أم ياسمين الوحيدة قالت: "أنا نفسى أسدد مصاريف أقساط العربية وأطلع عمره وأكمل جهاز بنتى".