أعرب رمضان صبحى، نجم المنتخب المصرى، لاعب ستوك سيتى الإنجليزى، عن حنينه واشتياقه للوطن فى ظل رحلته الاحترافية، قائلاً: "بلدى بتوحشنى.. نفسى أرجع مصر واشوف أهلى وناسى، لكن هناك هدف حاربت من أجله للوصول إليه ولن أهمد، وأنا مكمل فى الدورى الإنجليزى وأحترم تعاقداتى، وبحب البلد بس مش هقطع المشوار وارجع".
وقال نجم المنتخب المصرى إنه يسمع عن الأكلة الإنجليزية الشهيرة "فيش آند شيبس" لكنه لم يجربها بعد، ولكنه يتناول الأكل السورى واللبنانى القريب من المصرى.
وأضاف "صبحى"، فى حواره مع الإعلامى معتز الدمرداش، ببرنامج "90 دقيقة" المذاع عبر فضائية "المحور": "أكتر حاجة بحبها هناك محل ناندوز بتاع فراخ.. باكل كويس واخدت سكن ومستقر فيه وجبت القنوات الرياضية والتليفزيون المصرى كله".
وكشف رمضان صبحى سر اختياره للرقم 32 فى فريقه الجديد، موضحاً أن هذا هو رقمه المفضل والمناسب والذى يتفاءل به دائما.
كما كشف "صبحى" عن أغرب مواقفه مع السواقة وركن سيارته، قائلاً: "الإنجليز ملتزمون فى السواقة ولكننى فى إحدى المرات فوجئت بسيارة تقف مكان سيارتى، فاتجننت وركنت أمامها.. حتة وشغل مصرى كدا وقلت ناخدهم بالعين الحمرا عشان شكلهم مش هينفع معاهم غير كدا، وطلعت لنادر شوقى وكيل أعمالى متنرفز وقلت له أنت بتتكلم إنجليزى كويس لما يجى صاحب العربية تديله كلمتين حلوين عشان أنا على أخرى".
وتابع: "بعد 3 ساعات فوجئت بواحدة ست تعتذر لنا، فقال لها نادر مفيش مشكلة وأخذ يضحك معها، كانت حلاوتها إنجليزى.. وتعجبت من رد فعل نادر وقلت له مش دا اللى اتفقنا عليه يا نادر، فقال معلش بقا خليها علينا، والموضوع اختلف تماما".
تم أضافة تعليقك سوف يظهر بعد المراجعة