انتظر 3 سنوات من زواجه حتى رزقه الله بطفلته التى تبلغ من العمر 5 أشهر، طار بوصولها إلى الحياة فرحا، ومنحها مخزون حبه، إلا أنه تركها إلى ما لا نهاية بعد انتظارها طويلا، حيث فارق الحياة على يد صاحب محل طعنه بسكين لأسباب واهية.
.jpg "المجنى عليه")
المجنى عليه
اليوم السابع رصد جريمة القتل البشعة التى دارت أحداثها بمنطقة إمبابة وراح ضحيتها "أحمد كمال" الشاب الذى قتل على يد صاحب محل كباب، حيث تحدث والد زوجة الضحية قائلا: "أحمد كان شاب طيب ومحبوب من كل الناس، فى حاله وبيحب جيرانه وأصحابه، بيدير محل لبيع البيض بمنطقة إمبابة، تزوج بنتى من 3 سنوات ورزقه الله بطفلة منذ 5 أشهر، حصلت منه على كل اهتمامه ورعايته. ويوم الحادث كان قاعد مع عدد من أصدقائه أمام المحل الخاص به، وقرر يفطر معاهم عشان كان صايم، واشترى بعض الأطعمة وأرسل شخص يعمل بمحل كباب وكفتة كان قاعد معاه لصاحب المحل عشان يشترى 4 أرغفة عيش وأعطاه قيمتهم، لكنه فوجئ أن صاحب المحل "صلاح" جاى ومعاه سكينة وبيتخانق معاه بدون سبب وقاله أنا مش ببيع عيش لأى حد.
.jpg "المجنى عليه طلب 4 أرغفة خبز فقتله صاحب محل")
المجنى عليه طلب 4 أرغفة خبز فقتله صاحب محل
وأضاف والد زوجة المجنى عليه "ساعتها أحمد استغرب من صاحب المحل عشان بيتخانق معاه بدون دافع، وفوجئ أن صاحب محل الكباب بيطلع سكينة من ملابسه وطعنه فى صدره، وأصحابه نقلوه للمستشفى المركزى غرقان فى دمه، لكنه فارق الحياة وفشلت محاولات إنقاذه.
تامر فاروق صديق المجنى عليه وشاهد عيان على الجريمة روى تفاصيل الحادث فقال: "الجريمة حصلت قدام عنينا واحنا مش مصدقين اللى حصل، كنا قاعدين ولاقينا المتهم صلاح جاى وفى عينه الشر عشان يتخانق مع "أحمد" ولما حاولنا نبعده راح طلع سلاح أبيض وطعن "احمد" بصدره.
وأضاف صديق المجنى عليه: "وقتها انشغلنا بنقل "أحمد" للمستشفى وكنا معتقدين إن الإصابة بسيطة، لو كنا نعرف إن الإصابة خطيرة وهتموته مكناش هنسيب المتهم، لأن أحمد خيره على الناس كلها وفى حاله ومش بتاع مشاكل وميستهلش اللى حصله.
.jpg "المجنى عليه رزق بطفلة قبل مقتله بــ5 شهور")
المجنى عليه رزق بطفلة قبل مقتله بــ5 شهور
وذكر صديق المجنى عليه: "صلاح مكنش بيحب أحمد عشان قبل الحادثة كنت بهزر مع المجنى عليه وتصادف مرور المتهم، واعتقد إننا بنسخر منه، ولما عرفنا إنه زعل مننا رحنا صالحناه، لكنه للأسف كان مغلول من أحمد وانتهز فرصة إن الصبى الخاص بالمحل بيقوله إن المجنى عليه عايز عيش، خد منه الفلوس وقاله مفيش عيش وأنا هارجع له الفلوس، وبعدها خد سكينة وراح على أحمد واتخانق معاه وضربه فى صدره بالسلاح.
وأكد مصدر أمنى بمديرية أمن الجيزة أن قسم شرطة إمبابة تلقى إخطارا من مستشفى التحرير العام بإستقبالها أحمد كمال 32 سنة جثة هامدة نتيجة إصابته بجرح قطعى غائر بالكتف الأيمن.
وبانتقال المقدم محمد ربيع رئيس مباحث قسم شرطة إمبابة إلى محل الواقعة تبين من التحريات أن المتهم بارتكاب الجريمة يدعى "صلاح.ك" 30 سنة صاحب محل كباب، وبإعداد كمين للمتهم تم القبض عليه، وبمواجهته اعترف بإرتكاب الواقعة بسبب سخرية المجنى عليه منه، وحرر محضر بالواقعة وأخطر اللواء هشام العراقى مدير أمن الجيزة واللواء خالد شلبى مدير الإدارة العامة للمباحث وأمرت النيابة بحبس المتهم على ذمة التحقيق.
.jpg "الضحية قتل أمام المحل الخاص به بإمبابة")
الضحية قتل أمام المحل الخاص به بإمبابة
.jpg "المحل الخاص بالمجنى عليه")
المحل الخاص بالمجنى عليه
