قال الكاتب الصحفى خالد صلاح، رئيس مجلس إدارة وتحرير "اليوم السابع"، إن البرلمان طرح اليوم أزمة الأدوية خلال جلسته، وكون لجنة تقصى حقائق فى ملف الدواء للوقوف على الأزمة مع شركات الأدوية، فيما أكد رئيس البرلمان الدكتور على عبد العال، أن المشكلة ستحل خلال يوم أو اثنين.
وتساءل خالد صلاح، "هل رئيس البرلمان سمع من الحكومة أن لديها حلا للأزمة؟ وهل ستقوم باستيراد الأدوية؟"، مشيرا إلى أن تلك الأزمة تتطلب تفكيرا خارج الصندوق حتى لا تتفاقم لدى المواطن الذى يعانى كثيرا عقب الإجراءات الاقتصادية الأخيرة، مضيفًا "المواطن لبس فى الحيط".
وأكد الكاتب الصحفى، ببرنامج "على هوى مصر" الذى يذاع على فضائية النهار one، أن مصر تعانى مشكلة حقيقية لها علاقة بأسعار الأدوية، حيث أتاحت الحكومة المصرية فرصة للزيادة بها قبل رفع سعر الدولار بالبنوك، وتعرضنا بعدها لخداع كبير من عدد من الصيدليات الذى رفعت الأسعار، حيث كانت تبيع "الشريط بسعر العلبة فى الأقراص"، وبعد تحرير سعر الصرف تعانى أعداد كبيرة من شركات الأدوية فى أن تفى بكل مستلزماتها من الدواء فى السوق، مضيفًا "الدواء سلعة ليست استراتيجية، لكن هو مسألة حياة أو موت".
وأشار إلى أن سعر الدواء لا يجب أن يزيد عن طاقة المواطن العادى الذى يستخدمه، مضيفًا "مينفعش إنه فى الدواء يتلعب معاه"، متابعًا "لو شركات الأدوية دفعت الـ17 جنيه فى قيمة الدولار علشان تجيب المواد الخام وتصنع جوه هتلعب فى الأسعار، والنهارده تيجى شركة الدواء تقولك هامش الربح بتاعى كان قليل، وأنا كنت مقدر العيانين والإخلاص والوطنية.. لكن فى النهاية أنا هخلص قد أيه؟".
وطالب خالد صلاح، الحكومة المصرية بإجراءات تضبط توفير الدواء فى السوق بأسعار مناسبة للمواطنين، مضيفًا "أنا مش هتكلم عن الطبقات المعدمة اللى الحكومة بتعالجها، أنا بتكلم عن المواطن العادى اللى مش مشمول بحاجة من الحكومة".
وتابع :"المشكلة تتعلق بشق الارتفاع الضخم والهائل بعد التعويم، اللى أدى إلى أن الشركات دى عندها مشكلة كبيرة جدًا مع الدولار اللى كان بسعر وبقى بسعر تانى، ولو الحكومة فرضت على الشركات إنها تبيع بنفس الأسعار هيقولوا إن ده هيبقى مصيبة سودا عليهم، ومش هيكملوا لأن معندهومش أى اختيارات".
واستكمل "المواطن عندنا عدى من الحيط، وهتيجى تقوله استحمل كمان الدواء، يبقى هندخل فى منطقة حياة أو موت، وهنا الحكومة فى مأزق!".
واختتم الكاتب الصحفى حديثه بقوله: "نرجو من الصيدليات والشركات والناس اللى بتخزن أدوية، إنهم ما يعملوش كدا فينا، ولازم كمان الفترة الجاية يكون عندنا جهد كبير جدا فى الرقابة فيما يتعلق بالأدوية علشان ميحصلش إن حاجة مهمة فى الأدوية تختفى فجأة ونلاقى نفسنا فى أزمة من الأزمات اللى بتكون الأرواح ثمن فيها، لا من الناس اللى بيتاجروا فى الأدوية ولا من الحكومة، والدواء مفيهوش لعب".
