بالفيديو.. الرئيس يطلق استراتيجية تنمية مصر.. ويؤكد: اللى اتعمل فى سنة ونص ميتعملش فى 20 سنة.. ولو كل واحد صبح على مصر بجنيه هنجمع 4 مليارات فى السنة.. السيسى لوزير الداخلية: هناك تجاوزات غير راض عنها

- السيسى لوزير الداخلية: "مش هينفع نهين المصريين ولو حد فينا غلط يتحاسب"
- السيسيى للمصريين: "لو بتحبوا مصر صحيح.. اسمعوا كلامى أنا بس".
- السيسى لنواب البرلمان: "أنتو مش قادرين تحسوا إنكم عملتم حاجة حلوة ليه"
- السيسي: أكثر من 50% من مساحة مصر عشوائيات.. ومش هسكت
- السيسى: اللى هيقدم على شقة وتنطبق عليه الشروط هياخدها
- نصيب مصر فى المياه لم يتغير ونجحنا فى تقليل تكاليف المشروعات للنصف
- السيسى: تم الانتهاء من 3 مطارات سعة كل مطار 1.7 مليون راكب
- السيسى: أنجزنا مشروعات كهرباء بـ150مليارجنيه ومحدش يتصور إنهاء الأزمة فى سنة

دشن الرئيس عبد الفتاح السيسي، اليوم الأربعاء، بمسرح الجلاء، "رؤية مصر 2030"، استراتيجية مصر للتنمية المستدامة، والتى أعدتها الحكومة المصرية، وتهدف إلى أن تكون البلاد من ضمن أفضل 30 دولة بحلول عام 2030، وذلك فى حجم الاقتصاد، ومكافحة الفساد، والتنمية البشرية، والتنافسية، وسعادة المواطنين.

وقال الرئيس السيسى: "اسمحوا لى أن أوجه لكل الشعب المصرى التحية والتقدير والاحترام، وسأتحدث اليوم بكل صدق وإخلاص وأمانة وبكل علم، أتحدث إلى كل المصريين خاصة كل فئات الشعب المصرى وليس المثقفين فقط، لأنه فى حال تفهم كل المصريين ما أقوله سيصبح الأمر بسيطا وسهلا".

وتابع الرئيس السيسي: هدفنا هو الحفاظ على الدولة المصرية، أى دولة غايتها القومية هى بقاؤها، بمعنى أن الدولة المصرية خلال السنوات الماضية كانت معرضة لتهديد حقيقى وما زالت، وتحدثت أمام البرلمان بكل وضوح، هل من كانوا يتمنون ويعملون من أجل أن يكون مصير مصر كمصير الآخرين قائم أم انتهى، إذا كان انتهى، فذلك خير، ولكنه لم ينته بعد، ما زالت المحاولات تبذل لكى تسقط مصر، وأن كل التحديات التى يمكن الحديث عنها وكل المخاطر ليس لها أى قيمة أمام الحفاظ على وحدة المصريين، وما يتم الآن محاولة العبث بوحدة المصريين، سواء مؤسسات الدولة مع بعضها البعض، أو فئات المجتمع مع بعضها البعض، فالإرهاب لم ينفع، والضغوط لم تجد، فسيتم الآن تجربة أشياء جديدة، ولن ينتهى هذه الأمر إلا بنجاحنا الحقيقى.

وقال الرئيس السيسي: لا أتحدث عن المخاطر حتى يتم أخذ أية إجراءات استثنائية، فهل توحدكم إجراء استثنائى، هل الخوف على بلادنا إجراء استثنائى، أن نكون كتلة واحدة إجراء استثنائى.. كانت استراتيجيتنا وسياستنا هى المحافظة على الدولة والبناء، وسوف أتحدث إليكم على ما تم تنفيذه خلال الـ 20 شهرا الماضية، فيما يخص البنية الأساسية والتى يوحد بها نقص شديد، ففى الطرق تم بناء 5 آلاف وستكتمل إلى 6 آلاف سيكونون جاهزين آخر هذا العام إن شاء الله.

وأضاف: نحن نحاول بناء دولة حقيقية، سوف أتحدث عن أشياء نعرفها، أنا بتكلم عن 133 كوبرى فى 20 شهرا، حتى يكون التحرك أسهل من مكان لآخر، وبما يساعد فى توفير الوقت وكذلك الوقود، والمواطن اليوم يريد أن يشعر أنه يتعامل بشكل معزز ومكرم يستطيع السير بصورة يسيرة.. فمصر بها نحو أكثر من 70 ألف كيلو متر طرق، موجودين على مدار تاريخنا، لو أردنا عمل صيانة لها وتمكنا من عمل 10% من الطرق يكونوا 7 آلاف كيلو، أى أنه يتم الانتهاء منهم على 10 سنوات، وبما يتيح دعوة المستثمرين وتسهيل حركات الصناعة لهم من خلال تلك الطرق والبنية الأساسية".

وحول مشكلة الطاقة، قال الرئيس السيسى: مشكلة الطاقة التى استمرت فى مصر من 7 أو 8 سنوات، حد يتصور أن المشكلة دى تخلص فى سنة.. إحنا مش عايزين ننسى.. طيب بكام؟ بـ 150 مليار جنيه، الطرق التى تم تنفيذها تكلفتها لا تقل عن 50 مليار جنيه، زى ما بقولكوا كده.. وإحنا بنعمل الطرق دى كان بيتعمل داخل المطارت حقول طيران حوالى 600 كيلو، ومشكلة الكهرباء تم الانتهاء منها خلال سنة، بل ودخلت كهرباء لمصر تكفى حتى 2017، ما يمثل 50% من كهرباء مصر على مدى تاريخها.. هذه الكهرباء لا تخص فقط استخدامات المواطنين، بلا تخص أيضا الصناعة.. يعنى نرحب بأى مستثمر ينفذ صناعات فى مصر".

وتابع الرئيس: "أنا عارف مصر زى ما أنا شايفكم قدامى كده وعارف علاجها.. وأنا بوجه حديثى لكل من يسمعنى فى مصر.. لو سمحتم متسمعوش كلام حد غيرى.. أنا بتكلم بمنتهى الجدية.. أنا مش راجل بكذب ولا بلف ولا بدور، ولا ليه مصلحة غير بلدى.. وفاهم أنا بقول إيه".

وأوضح الرئيس السيسى أن "البرنامج اللى اتعمل ده كان الهدف منه إننا لأول مرة نعرف شبابنا قضية مصر الحقيقية من خلال برنامج مدته 3 شهور وتستكمل دراسته.. لن أسمح بتمزيق مصر، خلى بالكوا أنا مش هسمح بكده، محدش يفكر إن طولة بالى وخلقى الحسن معناه إن البلد دى تقع.. قسما بالله اللى هيقربلها لاشيله من فوق وش الأرض.. أنا بقول لكل مصرى بيسمعنى انتوا فاكرين الحكاية إيه.. أنا مسؤول أمام الله عن 90 مليون مصرى، وسأقف أمام ربى يوم القيامة أقوله أنا خليت بالى منهم.. عايزين تخلوا بالكم منهم معايا، أهلا وسهلا، مش عايزين لو سمحتو اسكتوا"، أنا بتكلم كده عشان مصر برقبتنا كلنا، وأنا لما بقول كده لا أشكك فى أحد.. بس خلوا بالكم أنا باتكلم مع كل المصريين بكل ظروفهم.. أنت بتفقدهم معنوياتهم ليه"؟.

وأضاف السيسى خلال كلمته بمؤتمر"رؤية مصر 2030" بمسرح الجلاء اليوم الأربعاء، أن الهدف هو الحفاظ على الدولة المصرية والغاية هو بقاء الدولة المصرية، فمصر خلال الفترة الماضية كانت معرضة لتهديد خطير واللى كانوا يعملوا على أن يكون مصير مصر كالآخرين هل انتهوا أم لا "إذا كان انتهى يبقى خير" لكن مازال التآمر ينفذ ضد مصر.

وانفعل الرئيس عبد الفتاح السيسى موجها حديثه لمن لا يريد مصلحة الوطن قائلا: "أنتو فاكرين الحكاية إيه، انتو مين، المصريين 90 مليون، وأنا مسؤل عنهم"، ووجه حديثه للحضور: عايزكم تخلو بالكم منهم معايا، ماشى، لو مش عايزين اسكوتوا"، وأضاف السيسى، مصر فى رقبتنا كلنا، وأنا لا أشكك فى أحد".


وقال الرئيس السيسى، إننا ننشئ ميناء شرق التفريعة على أرقى مستوى، وهناك 9 شركات تعمل الآن، مؤكدا أنه خلال سنتين سيتم الانتهاء منه، متابعًا: أنه فى المطارات تم الانتهاء من 3 مطارات ونحصل الآن على العلامات الملاحية، وكل مطار سعته 1.7 مليون راكب.

واستعرض الرئيس السيسى، نجاح الدولة فى تقليل تكاليف المشروعات إلى النصف، مشيرًا إلى أنه طالب من الوزراء بضرورة التدخل فى تفاصيل تكاليف المشروعات للحد من الفساد، وأضاف: أن حجم المياه الذى يصل إلى مصر لم يتغير إلى الآن، ونحتاج إلى 10 ملايين جنيه لمعالجة المياه، ونستهدف 500 ألف متر مكعب من تحلية المياه يوميا، وقد نصل إلى مليون متر مكعب فى السنة.

وحول مشكلة المياه قال الرئيس عبد الفتاح السيسى: "صحيح إن الشباب قلق من الفقر المائى، وأنا معاكوا قلقان، فحجم المياه التى يتم معالجتها يوميا 10.5 مليون متر مكعب مياه، منها 8 ملايين معالجة ثنائية، "إحنا بصدد عمل محطات معالجة للمياه خلال العامين القادمين قد اللى اتعملت فى العشرين سنة الماضية".

وأضاف: نصيب المصريين هو دولة بتتبنى وتقوم، من أجل أن تعرفوا أن وراء كل حكاية حكاية كبيرة، هقول الكلام ده بالرغم إنه من منظور الأمن القومى غير صحيح".

وقال السيسى: "فى سد بيتعمل، وهنتفق مع الناس على عدد سنين معينة لكى يبنوا السد، طب الميه أعوضها منين، أسبيب الفلاحين من غير ميه ولا إيه". وأضاف: "لو سمحتوا اللى يتكلم فى موضوع يدرسه كويس، أو تعلالى، وأنا أقول لك الحكاية إيه لازم تذاكر موضوعك اللى بيتكلوا للناس".

وقال السيسى: "والله العظيم لو ينفع اتباع لأتباع علشان نعمل للناس ما يليق بيهم، مضيفا أن صندوق تحيا مصر إجمالى المبلغ فيه 4.7 مليار جنيه، منها مليار جنيه من الجيش، ولو كل واحد صبح على مصر بجنيه من الموبايل كل يوم هنجمع 4 مليارات فى السنة".

وحول الوحدات السكنية المقدمة للشباب، قال الرئيس عبد الفتاح السيسى، إن كل من يقدم على شقة وتنطبق عليه الشروط هياخدها، مازحا: "الشقق هتكون بالشكل اللى شوفتوه عند السجادة الحمراء.. فاكرين"، وأن الـ100 ألف شقة تتكلف 16 مليار ونصف مليار جنيه.

وأكد الرئيس عبد الفتاح السيسى، إن أكتر من 50% من مساحة مصر عشوائيات، قائلا "بنتكلم على العدالة الاجتماعية.. والناس مرمية ومصورنهم فى التليفزيون ويقولك فين الحكومة والدولة! وبيعيرونا بفقرنا بس أنا مش هسكت" ولو إحنا مصريين بجد منمنش إلا لما نبنيها.. ولما حد يوجعنى ببقى مش عايز أرد عليه".

وتابع: "المناطق العشوائية عندنا 4500 قرية فى مصر ولو مخدناش بالنا وتصدينا للمشكلة مظبوط هيبقى بعد 15 سنة فيه 35 ألف قرية عشوائية، وكل الظهير الصحراوى بتاع الصعيد النهاردة يُدرس لإطلاق مساكن فيه علشان نوفر للناس مساكن واللى هتكمل على الاراضى الزراعية".

وقال الرئيس عبد الفتاح السيسى، إن هناك 250 مليار جنيه خدمة الدين، قائلا: "أى أن سلف الدولة حتى عام 2011 كان حوالى 1000 مليار، وخلال الأربع سنوات الماضية أصبح 2000 مليار والرقم الحقيقى أكثر بكثير.

وأضاف: "لما الناس التقت بيا فى الحملة قولت الكلام ده، أحسن حد يتصور إنى بقول كده علشان موقع الرئاسة، أنا بقوله للناس علشان تبقى عارفة".

ووجه الرئيس عبد الفتاح السيسى، حديثه إلى المصريين قائلا: "أنتو هتعرفوا أكتر منى.. الحكومة دى كويسة ولا لأ.. وأنا بقعد معاهم كل يوم.. وأنا مش بدافع عن حد.. وهو مسئول الحكومة بياخد أيه علشان يستحملك وتضرب فيه ليل ونهار وفى الجرائد وغيره".

وأضاف: "لو فى حاجة عايزة تتعدل هنعدلها، وأرجو إننا نوفر مناخ جيد وحافظوا عليه وشجعوه"، مؤكدا وجود الكثير من التحديات، مطالبا بضرورة تناول أداء الحكومة بشكل موضوعى وعلى أسس سليمة.

وقال الرئيس عبد الفتاح السيسى، إننا استطعنا أن نحسن موقفنا مع الدول، فهناك الكثير من الدول تسمع هل القضية محاولة تغيير حكم بالقوة ولا إرادة شعب.. أرادوا التغيير، قائلا: "افتكر إن الأمر بقى واضح مفقدناش علاقة مع حد على كافة الأصعدة آسيا وأفريقيا والصين وروسيا وكوريا ".

وحول تواصل الدولة مع مؤسسات الإعلام، قال الرئيس عبد الفتاح السيسي: "لا يوجد تواصل حقيقى بين الدولة ومؤسسات الإعلام، ومفيش تواصل حقيقى بشكل منتظم مع مؤسسات الإعلام".

وأكد الرئيس السيسى، أن هناك صراعا يتم معنا ومحاولة لإيقاف البناء والسعى لتدمير البقاء، مضيفا: "لا يمكن حد يستطيع ينال من مصر طول ما المصريين كتلة واحدة".

وخاطب الرئيس الشباب قائلا: "نسعى إلى تجهيز الشباب وتوفير ما أمكن فى ظل ظروفنا، حاجة ممكن تشجعكم ونطمئنكم على بكره.. وفى مشاريع جوه مصر تضم مش أقل من 2 مليون مواطن".

وطالب الرئيس المصريين بضرورة الحفاظ على حالة التوافق المجتمعى التى تشكلت بعد 30 يونيو للحفاظ على مصر، مضيفًا: نبنى الدولة الديمقراطية فى ظروف صعبة، ومازال هناك الكثير من العمل، ولنسع بعضنا البعض، مشيرًا إلى أن مجابهة الإرهاب بدأت بعد 30 يونيو، مضيفًا: هما اللى بدأوا.. وهناك تجاوزات ولكن لا أرضى عن هذه التجاوزات، لكن المعادلة هى إزاى أحكمها وماتوقعش منى، وفى نفس الوقت مافيش تجاوزات".

وتابع الرئيس عبد الفتاح السيسى: "افتكروا واحنا بنعمل الدستور والاستفتاء كنا إزاى، والآن فى دستور وتشريع بيحكم، وهناك إطار بين المؤسسات تم تحديدها، أى عبث فيه يكون عبث فى البقاء".

وتساءل الرئيس: "ياترى البرلمان دلوقتى حد تدخل فيه أثناء الانتخابات لنأتى بشخص معين، البرلمان جاء بإرادة الناس، 50% من النواب لأول مرة أعضاء فى البرلمان المصرى، مما يؤكد عدم وجود تزوير فى الانتخابات، وثلث البرلمان من الشباب وهذا إيجابى، والنساء عظيمات مصر بالبرلمان، فتمثيل النساء فى البرلمان المصرى جيد، مقارنة ببرلمانات العالم.

وقال السيىسي: "أنا مش مرتاح إننا مش شايفيين كل ده"، مضيفا: "ساعات بنجيب لكم بعض البرلمانات مش عايزيين نقول أسماءها بيضربوا بعض فى الجلسة، وأنتوا قاعدين، ليه مش قادرين تحسوا إنكوا عملتوا حاجة حلوة خلال الأربع سنوات الماضية".

وقال الرئيس السيسى: "اللى اتعمل فى السنة ونص اللى فاتوا ميتعملش فى عشرين سنة، وده ليس جهدى أنا بل جهد المصريين.. فالتحية للمصريين"، مضيفا: بطمن المصريين على بلدهم، ومصر واقفة بخير وأمان وسلام، ومحدش هيقدر عليها.

وحول إسقاط الطائرة الروسية، قال الرئيس السيسي، من أسقط الطائرة الروسية فوق سيناء كان هدفه ضرب العلاقات الدولية لمصر مع روسيا.

وأضاف: اللى وقع الطائرة الروسية فوق سيناء كان يقصد ضرب السياحة، مضيفًا: القصد الحقيقى من الحادث ضرب العلاقة مع روسيا وإيطاليا لعزل مصر عن العالم.

وأكد السيسى، على أهمية الاصطفاف الوطنى وأهمية الحفاظ عليه قائلا: "مش هينفع نهين المصريين، لازم نعرف، إن كلنا واحد، الحق مش تنصر الظالم، لو حد فينا غلط يتحاسب، والكلام ينطبق علينا كلنا"، مضيفا: "مقدرش أقول لو واحد غلط فى الداخلية تبقى الداخلية كلها وحشة".

وطالب الرئيس عبدالفتاح السيسى طارق عامر محافظ البنك المركزى بالكشف عن حجم الأموال التى حصلت عليها الشركات المختلفة من القطاع المصرفى، مؤكدًا أن هناك 50 شركة فى مصر حصلت على قروض بقيمة 250 مليار جنيه، وأن الفترة السابقة شهدت تركيزًا فى إقراض الشركات الكبيرة، ولكن لن نمنع الإقراض لهذه الشركات.

وكشف الرئيس السيسى أن الدولة خصصت 200 مليار جنيه للشباب، مطالبًا الحكومة بالتواصل والتنسيق فى المناطق الصناعية لتجهيز تلك المناطق للشباب، معربًا عن خشيته فى حال عدم إقامة مناطق للشباب بالمناطق الصناعية من انتشار الصناعات الصغيرة والمتوسطة بشكل عشوائى، مضيفًا: يجب تخصيص أماكن للشباب فى المناطق الصناعية.

وطالب الرئيس بضرورة وجود تصور جديد فى العلاقة بين الشباب والبنوك، مضيفًا: "عايز أنظم الدنيا، علشان ما أظلمش ابنى وادخلوا فى مهمة اضيعوا فيها" ومضى فى حديثه قائلا: "اعملوا ألف مصنع وأجيب معداته تحت سيطرة الدولة فى التشكيل والبناء، علشان يخش المكان يلاقى فيه مركز تأهيل ومستشفى ومعرض للدراسة ".

وتابع: "لو ماعملناش كده هانقعد 30 سنة على ما نقدر ناخد مكان زى الدول اللى خدت مكانها، موجها كلامه للمسئولين: "لو كنتوا عملتوا مدينة دمياط للأثاث من سنة كانت زمانها بتتسلم للشباب ألف ورشة دلوقتوا، "الروبيكى" عاملنهالى على 3 مراحل، اسألوا عليا فى الجيش، أنا مابشتغلش غير مرحلة واحدة، الغلابة والناس مش هاتستحمل، أنا ماعنديش غير مرحلة واحدة".

واستشهد الرئيس بفكرة ابنى بيتك قائًلا: "فكرة ابنى بيتك، خد الشباب مشروع ابنى بيتك العشوائى، واحنا مابنعملش كده، إحنا بنعمل عمل كامل ومتقن محترم، ونتصدى لمشاكلنا ونقوم بحلها، وغير كده لن يكون هناك أمل".

وقال الرئيس السيسى:" نقوم بعمل كيانات للصناعات المحتملة كى نضمن نجاح الشباب، ومانخلوهوش يخوضوا تجربة قاسية، وقادر بفضل الله سبحانه وتعالى أعمل 100 منطقة صناعية فى خلال سنة ونصف، وأقدر أعمل مليون شقة فى سنة واثنين، أقدر أعمل كده لاولادى، انتوا فاكرين نفسكوا ضعاف ولا إيه؟، مصر، دى دولة كبيرة تقدر تعمل كل حاجة".

وقال الرئيس عبد الفتاح السيسى: عندنا 3.7 مليون شقة مجهزين بشكل عشوائى، بمعنى أن الصرف الصحى والمياه والكهرباء غير معمول حسابهم، موجها كلامه إلى الحضور قائلا "انتو فاكرين إنى هسبها.. أنا هفضل ابنى فيها واعمر فيها لغاية لما تنتهى حياتى يا إما مدتى". وتابع: "بقول الكلام ده وارجوا إن الناس تخلى بالها إننا إن لم نكن كلنا جنب بعض ونخلى بلنا من بدلنا هتبقى المهمة صعبة علينا كلنا".

ووجه الرئيس عبد الفتاح السيسى، كلامه الى المصريين قائلا: "إن لم نكن جميعا بجانب بعضا البعض، هتكون المهمة صعبة على المصريين كلنا، متدوروش على المكسب القريب، ولازم نتحمل لأجل خاطر أولادنا وأحفادنا".

واستطرد: "بكلم محدودى الدخل اللى خايفين على أن بلدهم تضيع منهم، واحنا فى تحدى كبير، وهنحط إدينا فى إيد بعض، وطول ما المصريين كتلة واحدة هنقدر نعمل كل اللى إحنا عايزينه واللى عايزين نعمله خير وسلام وبناء".

وخاطب "السيسى" طارق عامر رئيس البنك المركزى "عايز اعمل أحسن حى مال وأعمال فى الشرق الأوسط فى العاصمة الإدارية الجديدة".

واختتم "السيسى" كلامه فى فعاليات مؤتمر "رؤية مصر 2030" بمسرح الجلاء، برسالة إلى المصريين قائلا: "لو بتحبوا مصر صحيح.. اسمعوا كلامى أنا بس".

موضوعات متعلقة..

بالفيديو.. أخطر 30 رسالة من السيسى للمصريين:ماتسمعوش كلام حد غيرى أنا لا بكدب ولا بلف وادور..اللى يقرب من مصر هشيله من على وش الأرض.. ويؤكد للبرلمان:فى دستور وتشريع بيحكم وأى عبث هيكون عبث فى "البقاء"