وروت "سلوى" والدة شيرين، خلال التحقيقات التى أجرتها نيابة الأميرية، مأساة ابنتها التى تبلغ من العمر 12 عاما، حيث قالت: "بنتى كانت بتشعر بألم فظيع فى أسنانها نتيجة الالتهابات اللى أصابت اللثة بتاعتها، وبسبب تعب اللثة بقت تتعرض لأمراض مزمنة وكانت ديما مصابة بالصداع، وساعتها سألت كتير من قريبى وجيرانى عن دكتور كويس ممكن ألجأ ليه لعلاج بنتى".
وأضافت والدة المجنى عليها: "المهم دلونى على الدكتور (سعد الدين.م)، وبالفعل خدت بنتى على الطبيب، ولما كشف عليها، قالى البنت لازم تشيل أسنانها كلها وتركب طقم أسنان صناعى طبى، ولما رفضت اقتراحه وطريقة علاجه لبنتى، قالى بنتك لو متخلصتش من أسنانها هتصاب بمرض خطير والمرض اللى فى الأسنان هينتقل على اللثة وساعتها مش هنقدر نعمل حاجة، وفضل يكلمنى كلام أطباء أنا مقدرتش أفهمه، ولما حاولت أقنعه إننا نعملها (تقويم) بدل ما نشيل أسنانها، لأن البنت صغيرة ومش هتتحمل، رفض وقالى عندك الدكاترة كتيرة".
وأشارت: "اتفقت معاه على كورس العلاج وأنه هيشيل أسنان البنت، ونركب لها طقم أسنان، وقالى الكورس هيبقى خلع 3 أسنان كل جلسة، وبالفعل فضلت ماشية معاه لمدة 3 جلسات، كان فى الوقت ده خلع للبنت 10 أسنان، وبنتى لقيتها بتدبل قدام عينى، وجسمها بقى هزيل، وكانت ديماَ تعيط وتقولى مش عاوزه أتعالج يا ماما، لكنى من خوفى عليها وبسبب تخويف الدكتور ليا بأنها هتصاب بمرض وحش لو فضلت سننها موجودة، كنت ديماَ بصبرها".
وتابعت والدة المجنى عليها: "لكنى لما لقيت صحة بنتى بدأت تدهور، لجأت لدكتور تانى عشان يطمنى عليها، ولما الدكتور التانى شافها وحكتله على اللى حصل فضل يزعق ويقول إزاى عملتى فى بنتك كده، أسنان بنتك سليمة ومفهاش حاجة خالص، وكانت هتتعالج بـ(التقويم) مش الخلع، أنتى والدكتور الغبى ده كنتوا هتموتوا البنت، ساعتها رحت حررت ضده محضر".
من ناحية أخرى، أثبت تقرير الطب الشرعى أن أسنان المجنى عليها "شيرين.أ"، 12 سنة، سليمة وغير مصابة بأى إصابات تستدعى لخلعها أو إزالتها، حيث أسندت النيابة العامة للطبيب ارتكاب جرائم "الإهمال الطبى، مخالفة الأسس العلمية، إحداث عاهة مستديمة".
من جانبها، قررت محكمة جنح مستأنف الأميرية، برئاسة المستشار طارق دره، وعضوية المستشارين محمود شرف، ورامى عامر، وأمانة سر محمد فتحى، حبس المتهم "سعد الدين.م"، طبيب أسنان، 3 أشهر مع النفاذ، على خلفية اتهامه بالإهمال الطبى.
موضوعات متعلقة..
كارثة طبية بالبحيرة.. وفاة طالب بعد رفض التأمين الصحى علاجه من الغدد الليمفاوية رغم حصوله على حكم قضاء إدارى.. وزير الصحة: أنا غير مسئول عن التأمين.. والهيئة: القضاء لا يختص بقضايا العلاج
