الحزن فيك يا وطن
يشبه نايات الليل
يعزف بصوت الشجن
يبكى السمك فى النيل
وأنت اللى م المبتدا
عز الضلام قناديل
يحدف نخيلك رُطب
بحلاوة الترتيل
دلوقتى حتى النهار
متدارى خلف غيوم
ليه يا وطن بتصوم
وتبل ريقك ويل ؟!
شايفك حزين يا وطن
وأنت اللى كنت ضحوك
شايفك غريق فى المحن
ليه فى المعاصى رموك؟
مين اللى رسمك وجع ؟
مين اللى زرعك شوك ؟
مين داقوا شهدك زمن
بعد الزمن وباعوك ؟
دانت اللى شمسك دهب
وانت اللى قمرك علم
قوللى يا بانى الهرم
مين اللى جُم هدموك ؟!
امتى تعود بسمتك
تروى السنابل ضى ؟
واسمع نغم غنوتك
بتنادى بكره الجى
دانت اللى فى عز الوجع
ما نطقت كلمة أى
وأنت اللى وقت العطش
فى الأرض معنى الرى
وأنت اللى وقت الحر
ع الترعة شجرة توت
لو حتى كُلُّه يموت
أنت اللى تصبح حى
عايزك تعود يا وطن
صوت الأمين جبريل
وتشق بحر المحن
بعصاية التنزيل
يحضن أدانك جرس
بعد الشقا والتعب
يرجع نخيلك رُطب
بحلاوة الترتيل
نخل
