رواد فيس بوك يدعمون محمد دياب ويتفاعلون مع إشادة توم هانكس بفيلم "اشتباك"

شهد نشر المخرج محمد دياب مخرج فيلم اشتباك لخطاب إشادة النجم العالمى توم هانكس على حسابه الشخصى بموقع التواصل فيس بوك تفاعلا شديدا حيث قام أكثر من 6 آلاف متابع بعمل "share" للخطاب، إضافة لدعمهم عرض الفيلم بعدما دشن دياب هاشتاج "ادعم فيلم اشتباك".

وكان دياب نشر خطاب توم هانكس على الفيس بوك وقال: "الرسالة دى من (توم هانكس) بيشيد فيها بالمستوى الفنى لفيلم إشتباك … مبعتليش إيميل لأ ده أهتم لدرجة أنه بعتلى جواب ماضيه بنفسه بيقول فيه إن الفيلم قادر على تغيير الصوره النمطية اللى الغرب بيشوف بيها المصريين.. دانيل كريج بطل أفلام جيمس بوند بعتلى رسالة بنفس المعنى... يعنى عكس الكلام بتاع تشويه سمعه مصر".

ودافع دياب عن الفيلم قائلاً: "نفس الفيلم ده هو هو بيتعَرّض فى بلده لخطه لخنقه من قبل ما ينزل.. طب ليه ميتنمنعش!؟ عشان ده فيلم احتفى بيه مهرجان كان واختاروه فيلم افتتاح قسم (نظره ما) والجرايد العالمية اختارته من أهم 10 أفلام فى المهرجان فلو أتمنع هتبقى فضيحة دولية فالحل ينزل من غير ما حد يحس بيه ويتشال بعد يومين من السينما.. ويبقى الفيلم الناس هى اللى تجاهلته ونتفادى فضيحة دولية فكرة عبقرية الصراحة تانى هكرر أن المفارقه أن الفيلم مش ضد حد وأنه فيلم بيرصد الهيستيريا والإستقطاب وجوهرة إنسانى.. وده كان رأى النقاد المصريين اللى شافوه على اختلاف توجهاتهم".

وعلق دياب على ما وصفه بالحملات التى تثار ضد الفيلم، قائلاً: "هعتبر الحملات اللى لم تتوقف من وقت مهرجان كان عن التشويه فى الفيلم وفى صناعه ومنتجيه (بنتعمد عدم الالتفات ليها عشان منسلطش عليها الضوء) صدفه وتأخير تصريح الرقابه لغاية امبارح وتآخير تصريح بوستر الفيلم اللى عامله المصمم العالمى أحمد عماد الدين مصمم البوم (بينك فلويد) الأخير فملحقناش نستخدمه هعتبره صدفة ولما الرقابة أصرت تحط جملة قبل الفيلم لها محتوى سياسى وبتحسب الفيلم على جهة ضد التانية ودى اعتراضى عليها سينمائى فتخيل مثلا إنك بتتفرج على فيلم عامل تنويه فى أوله بيفهمك مين وحش ومين كويس والمفروض تفهم ايه!… هعتبر ده تخوف من الهستيريا مع إن السيناريو مجاز رقابيا من غير ولا ملاحظة والرقباء قبل مهرجان (كان) لما شافوا الفيلم دمعوا وحضنونى وأجازوه للعرض فى المهرجان بلا ملاحظات لكن لما موزع الفيلم ينسحب قبل نزول الفيلم بأيام ولما كتير من السينمات متحطش بوسترات الفيلم حتى فى (الويك اند) اللى قبل نزول الفيلم فمضطر أفكر أن دى مجموعه كبيره قوى من الصدف وان الموضوع مقصود".


ودافع دياب عن فيلمه، وطالب الجمهور بدخوله فى دور العرض السينمائى، قائلاً: "فيلم من غير موزع يعنى فريق كورة داخل الدورى من غير مدرب … كده الفيلم ممكن يتشال من السينما بعد يومين تلاتة من نزوله لو فيه نية سيئة وأنا بدأت اقتنع بكده أنا بكتب الكلام ده عشان الفيلم مصيره بقى فى إيدكوا أنتوا … الجمهور … لو الناس مدخلتش الفيلم فى أول كام يوم فيه احتمال كبير متلاقيهوش ومتشوفهوش خالص … الخطه دى لو نجحت معتقدش حد هيجروأ انه يعمل فيلم ضد الفكر السائد أو يخاطر بأى فكره اصلاً لأن مين منتج هيبقى عاوز يخاطر بفلوسه فى مشاريع بتتوقف قبل ما تجيب فلوسها".

وتابع : "اشتباك اتباع فى 20 دوله فى أوروبا وأمريكا اللاتينة والشماليه وآسيا وهينزل فى شهر سبتمبر فى حوالى 200 دار عرض فى فرنسا لكن النجاح الأهم هو فى مصر وسط الناس اللى الفيلم معمولها فأرجوكوا ساعدونا إن الفيلم يوصل للناس … يوم الاربع 27-7 الجاى يا هيبقى بداية تجربة مختلفة يا نهايتها.. أنتوا اللى هتحددوا، وأخيراً أنا متأكد أن الجهات المتحكمة من الكواليس مش كلها على قلب رجل واحد لأنى بيوصلنى أن فيه ناس على أعلى المستويات فخوره بالفيلم... معرفش مين الجهة صاحبه الفكره العبقرية دى اللى كالعادة هتضرب فى وش اللى فكروا فيها واللى هتعمل فضيحة عالمية أكبر من المنع بس أنا متأكد أن الجهة دى بتضر الدولة أكتر ما بتنفعها بالذات لما تخترع معركة وهمية زى معركة اشتباك".

موضوعات متعلقة...

- الرقابة تجيز فيلم "اشتباك" لنيللى كريم.. ومنتجه: "محدش أجبرنى على حاجة"