أحمد فتحى "غاضباً": "زهقت من نغمة اللاعبين الكبار.. والبدرى هيعمل إيه يعنى؟"

أعرب أحمد فتحى، لاعب الأهلى والمنتخب الوطنى، عن غضبه الشديد من تكرار تردد كلمة "اللاعبين الكبار فى الأهلى.. ودور اللاعبين الكبار فى لم شمل الفريق".

قال فتحى، خلال تصريحاته لبرنامج "الملاعب اليوم" :"زهقت من موضوع اللاعبين الكبار ده جداً، ومش فاهم يعنى إيه لاعيبة كبار، وعايزين إيه من اللاعبين الكبار، ومش هما اللى بيديروا النادى.. ومش علشان أنا كبير هلف أزعق فى باقى زملائى الصغيرين.. وأنا زى أى لاعب، والكل بيجتهد لمصلحة النادى".

أضاف "الجوكر" : "والناس اللى بتقول نلم شمل الفريق، هو فى إيه اتفرد علشان يتلم أصلاً، والفترة الماضية كان سوء توفيق، وده أمر وارد فى كرة القدم.. ومافيش حاجة اسمها لاعب كبير ولاعب صغير، والكل سواسية والأفضلية للمجهود داخل الملعب، وهفضل أعارض الكلمة بكل معانيها سواء كبير سناً أو اسماً".

أردف أحمد فتحى: "الكل يسأل حسام البدرى هيعمل إيه مع اللاعبين الكبار؟!، هيعمل إيه يعنى هيعلقهم مثلاً ولا هيشنقهم ولا هيمشيهم؟!.. أنا بحس نفسى مش كبير سناً ولا اسماً.. والتاريخ فى مصر بيتمحى بسهولة والناس بتنسى بسرعة، وحارس بحجم عصام الحضرى لو دخل فيه هدف يقوللك ده مينفعش يقف جول اصلاً".