"يتيمة إمبابة" الناجية من الموت لــ"اليوم السابع": مسجل خطر خطفنى وهدد صاحب البيت بالقتل لو أبلغ المباحث.. حاول يغتصبنى ويصورنى عريانة لكن قاومته.. حاولت الهرب فسقطت من الرابع.. ونفسى فى شقة تلمنى

نجت من الاغتصاب والموت على يد مسجل خطر اختطفها واحتجزها 4 أيام بشقته بإمبابة، لتحكى الفتاة المجنى عليها "سارة.س.م" البالغة من العمر 17 عاما، لــ"اليوم السابع" تفاصيل الواقعة، قائلة: "أبويا وأمى كانت حالتهم على قدهم، كنت عايشة معاهم، لحد ما الاتنين ماتوا من المرض، من سنة ونص وأنا عايشة لوحدى، خلافات بينى وبين أقارب والدى دفعتنى لترك البيت، ومن وقتها وأنا عايشة فى الشارع، أوقات بنام فى بيت واحدة صاحبتى، وأوقات تانية مفيش غير الشارع اللى بيلمنى، بدور على أى عمارة تحت الإنشاء وبطلعها، وبفرش جرايد أنام عليها، البرد بياكل فى جسمى، لكن مفيش قدامى غير كدة، بعد وفاة أبويا وأمى سبت المدرسة، كنت بدرس فى الصق الثانى الثانوى، وكل حياتى اتغيرت، مفيش لا قرايب يسألوا عليا ولا بيت يحمينى فى عز البرد".

وأضافت المجنى عليها: "اليوم اللى اتخطفت فيه، كنت واقفة فى منطقة عزبة الصعايدة بإمبابة، وفجأة لاقيت شخص معرفوش عرفت بعد كدة اسمه قالى تعرفى بنت اسمها "وعد"، ولما قولتله لأ، قالى تعالى معايا عشان تشوفى صورها وتتعرفى عليها، ولما خفت منه رحت معاه، ووقفت تحت البيت وعرض عليا صور بنت، ولما قولتله معرفهاش هددنى "بمطواة" وكان معاه واحد صاحبه، قاله متسيبهاش تمشى، وضربنى بالقلم على وشى، وأجبرنى اطلع معاه شقته فى الدور الرابع".

وتابعت: "حاولت استغيث بسكان البيت، لكن كل الناس خافت، وصاحب البيت قاله سيبها تمشى حرام عليك، لكن قاله لو اتدخلت أو بلغت المباحث هقتلك واقتلها، وخاف صاحب البيت وسكت، وبعدين حبسنى فى شقته لمدة 3 أيام، كان بيحاول يغتصبنى ويصورنى عريانة، لكن أنا كنت بقاومه ورفضت إنه يعمل معايا أى حاجة وحشة، كان كل يوم بيضرب فيا، وفى اليوم الرابع كان شارب مخدرات وبرشام، وحاولت استدرجه عشان اهرب منه، وبصيت من الشباك، وقولتله تعالى ننزل الشارع، وفجأة لاقيته شالنى ورمانى من الدور الرابع وقعت على الأسفلت وجسمى كله اتكسر، لكن الحمد لله نجيت من الموت، وأنهت حديثها قائلة: "نفسى فى شقة تلمنى من الشارع واللى بيحصل فيه، محتاجة أى سكن فى أى مكان، ونفسى صوتى يوصل للمسئولين والحكومة.

أحداث الجريمة كما كشفت عنها مديرية أمن الجيزة بدأت أثناء متابعة النقيب محمد مجدى ضابط مباحث قسم شرطة إمبابة للحالة الأمنية، فشاهد تجمع عدد من الأشخاص حول فتاة ملقاة أرضا، وتبين من خلال المعاينة والتحريات أن الفتاة "سايرة.س" مصابة بكسور بجسدها نتيجة سقوطها من الطابق الرابع بعقار بمحل الواقعة، وتم نقلها إلى مستشفى إمبابة العام، وتبين إصابتها بكسر بالحوض وكدمات بأنحاء جسدها بالإضافة إلى اشتباه وجود كسر بعظام الفك السفلى والجبهة.

وبإجراء التحريات بإشراف المقدم محمد ربيع رئيس مباحث قسم شرطة إمبابة تبين أن عاطل يدعى " تامر.م" 37 عاما، مسجل خطر سبق اتهامه فى 11 قضية مشاجرة ومخدرات وسرقة بالإكراه، أجبرها على الصعود لشقته وحاول الاعتداء عليها جنسيا وتصويرها عارية، إلا أنها قاومته، وحاولت مغافلته للهرب، فسقطت من نافذة الطابق الرابع.

وبإعداد كمين للمتهم تم القبض عليه، وبمواجهته اعترف بارتكاب الواقعة، فأخطر اللواء هشام العراقى مدير أمن الجيزة وأمرت النيابة بحبس المتهم على ذمة التحقيق.