أنا مش حنادى وأقول البحيرة
ولا إسكندرية ولا حتى سينا
حنادى باسم التاريخ والحضارة
ونورك يامصر اللى نور عنينا
..................
حخطى حدودك واعدى الموانع
ونيلك وطينك ده شاهد وسامع
حضحى بروحى واجيلك مطاوع
يامصر انتى غالية وحبك مالينا
...................
كتبنا تاريخك بدم الشهيد
ولا ابن البحيرة ولا بورسعيد
ده مصرى ودمك بيجرى ف عروقه
ودى مش جمايل دا واجب علينا
....................
ميمك مصيرنا وصادك صبرنا
وره يعنى روحنا وقدرنا وضميرنا
هنفضل ولادك ولا حد غيرنا
حيسكن ف حضنك ولا حيساوينا
......................
وعلمك مرفرف فوق أرضنا
ودا مش مجرد علامة لنا
دا دمى وطينك ونسرك ونيلك
بيحيى قلوبنا وينور عنينا
....................
ونيلك دا نبع الأمل والأمانى
وعمرى ماحبعد واسيبك ثوانى
لأنك حبيبتى وعمرى وكيانى
وأمى الحنونة العظيمة الأمينة
...................
بكرر يا مصر وبقولك كمان
مفيش جوا منك حدود للمكان
ف شرقك وغربك جنوب أو شمال
دا بيت العروبة يا أجمل مدينة
