رد النجم تامر حسنى، على فيديو انتشر على مواقع التواصل الاجتماعى "فيس بوك"، يتحدث فيه شاب عن إصرار نجم الجيل على تحقيق حلمه، والمواجهات التى قابلها فى طريقها منذ خطواته الأولى وحتى صار نجم عالمى.
بوست تامر حسنى
وكتب تامر حسنى عبر صفحته الرسمية على "فيس بوك" موجها رسالته للشاب الذى تحدث عن الحلم وتحقيقه قائلا :"بشكرك يا صلاح على كلامك الإيجابى شبابنا فعلاً محتاج يسمع كلام كتير زي ده مع اختلافي البسيط معاك لرؤيتك للمنطق".
وفى البوست حكى النجم بعضا من ذكرياته قائلا :"أنا هحكى حكاية صغيرة بس اعتقد هتهمكم جداً، كان فى شاب اسمه تامر حسني طالب في كلية إعلام، ماكنش بيسمع غير كلام من نوعية بس ياعم شكلك وحش، ياعم ايه الدقن دي، ياعم صوتك مش حلو، ايه اللي انت لابسه ده، ياعم ايه النحنحة دي، ياعم ياعم ياعم.. كلام محبط و كله غلط.. بس الكلمة الوحيدة اللي اهتميت بيها في كل الكلام ده كلمة (ياعم) وقررت من جوايا إني اكون عم فعلاً، عم في مجالي وحلفت وأقسمت بالله وقلت لو راجل فعلاً أحرج كل دول وأحرج المنطق نفسه لأن في وقتها مكانش عندي أى مؤهلات للنجاح غير قلب حاسس انه عايز يطلع للامام، وعقل راجل قرر يفكر ويحلم ويتعب عشان يحقق اللي قلبه حس بيه زمان وعشان ينقذ عيلته في مجتمع بيحبط وبيسخر، مجتمع قاسي بلا رحمة مجتمع بيصنّف ويقسم الناس ويحاسب الناس على مزاجه مجتمع لا يرحم الفقير والضعيف ومن يومها قررت اكون غني، بس غني احلام وقوي إرادة من فولاذ وإخترعت مبدأ لنفسي وماشي عليه لحد النهارده (كل ما تُحبَط إنجح) لو الجملة مش راكبة أو مش فاهمها فكر فيها كويس هتلاقي الإحباط والزعل بياخدوا نفسيتك لورا أوي اوي إفتكر حاجة واحدة بس ان استك الرمح بعد كل الرجوع ده بيطلّع الهدف قوي قد ايه خلي احباطك وقود حرق بنزين خليه يحرق جواك معلش استحمل ما انت كده كده بتتحرق يبقى تستخدمه صح و تشتغل وتنطلق بيه يلا انطلق وإنجح يا صاحبى".
