ننشر نص المكالمات الهاتفية التى أوقعت مستشار وزير الصحة المتهم بالرشوة

حصل "اليوم السابع" على محتوى المكالمات الهاتفية التى ضمتها أوراق التحقيقات ضمن تسجيلات القضية رقم 5361 جنايات السيدة زينب، لسنة 2016 والمتهم فيها مستشار وزير الصحة المحبوس بتلقى رشوة، لتسهيل أعمال بالمخالفة للقانون، وذلك عقب إرسالها إلى الهندسة الإذاعية باتحاد الإذاعة والتلفزيون، لمطابقة الصوت الوارد فى المكالمات التى تم رصدها من قبل الجهات الرقابية للمتهمين خلال اتفاقاتهم على مبالغ الرشوة، والتى ساهمت فى سقوط المتهمين فى القضية.

وجاءت نتيجة المضاهاة الصوتية بمعرفة مهندسى الإذاعة الهندسية، مطابقة تماما لأصوات المتهمين الثلاثة فى القضية، وهم كل من "أحمد عزيز عبد النبى"، و" أيمن عبد الحكيم إسماعيل "، و"علاء أحمد حسن".

وتضمنت المكالمة من واقع تفريغ المكالمات المسجلة للمتهمين: جرس تليفون ليرد المتهم أيمن الوسيط على المتهم الأول أحمد، حيث أخبره أن الشخص الذى سوف يقوم بدفع مبلغ الرشوة متواجد بأحد الأماكن التى يتواجد هو بها أيضا، ومعه دفتر الشيكات الخاص به لإنهاء الاتفاق بينهم.

وجاءت المكالمة الأولى كالتالى :

المتهم الأول أحمد عزيز : أيوه يا حبيبى.

المتهم أيمن الوسيط : أيوه يا باشا بص ياباشا هوه قاعد بره " قاصداً المتهم الثالث الراشى" معاه دفتر الشيكات.

المتهم أحمد : ههه.

المتهم أيمن الوسيط: هو قاعد فوق لسه بس المفروض أخده " كلمة غير واضحة " بس هو رافض أن هوه يسلم ليا حاجة.

المتهم أحمد: ههه.

المتهم أيمن الوسيط: بيقولى بس والله ها أسلم ها أكتبهم بس ها أحطهم فى ظرف ولازم أقابل الباشا دقيقة واحدة الحاجه أخدها ولازم أسلمك.

المتهم أحمد : أيوه أيوه أيوه وأنت قاعد يعنى هوه هايكتب وأنت قاعد.

المتهم أيمن الوسيط : هاكتب معاك بس بقوله هاخد صورة بطاقتك قالى تاخد صورة بطاقتى ليه، قلت له لازم يبقى فيه صورة بطاقة.

المتهم أحمد : طيب خليه يكتبهم وأنت قاعد.

المتهم أيمن الوسيط: ماشى.

المتهم أحمد : يحطهم فى ظرف.

المتهم أيمن الوسيط: أه وهيخش عادى.

المتهم أحمد : لأه لما أقول مثلا أنا لسه فاقعد مع الدكتور " ياسر" يعنى.

المتهم أيمن الوسيط: أيوه أنا عارف أنا عارف هايكتب ويجهزهم عقبال ما أنت تيجى تقابله صح.

المتهم أحمد: أيوه بس أنت تبقى قاعد.

المتهم أيمن الوسيط: هاقعد معاه لحد ما يخلص صح.

المتهم أحمد : وتنك بقه لازق جنبه كده عشان ما يتبدلوش ولا حاجة.

المتهم أيمن الوسيط: أه ماشى.

المتهم أحمد :ماشى.

المتهم أيمن الوسيط: طيب ها أقول لحضرتك طب وصورة البطاقة هوه بيقولى.

المتهم أحمد: دى أنا هاخدها بطريقة تانية.

المتهم أيمن الوسيط: مش مشكلة دى صح.

المتهم أحمد: مش مشكلة.

المتهم أيمن الوسيط: ماشى ماشى ياباشا.

المتهم أحمد : اوكيه ماشى سلام.

لتنتهى المكالمة الأولى بين المتهم الأول والمتهم الثانى.