يا قبر واسع بيبانه
يا قبر ضيق علينا
راحوا الحبايب ما بانوا
وأنت اللى وحدك أوينا
الدمعه ماده لسانها
بـ تعاير الضحكه فينا
مين اللى حطم حِيطانها
مين اللى دايما بالينا
يا صَبر اصُبر وصبّر
قلبى اللى تاه ف الموالد
عاش قلبى ليهم وكبّر
شالهم ف عز الشدايد
النخله عوجه وطارحه
أحلى الرطب لينا ناكله
والدنيا عوجه وبارحه
لكل واحد تشاكله
الهَم فيها كافينا
ع الأرض ليه كل مادا
والحزن فينا كافينا
مش محتاجينه بـ زياده
الفرح أبخل ولادنا
والظلم أسوأ ما لينا
والكرب دايما قاصدنا
والجرح فينا مالينا
إيه تسوىَ جنه بدونهم
إيه قيمة الحور معانا
دا البصه تكفى ف عينهم
والبعد أكتر كوانا
مكسور يا ضِلع المحبه
مجبور على الاستكانه
لا لقينا حَظ الأحبه
والقلب عافر وعانىَ
القمره طارحه لهيبها
والشمس تايهه ف سمانا
والنور دايما سايبها
والكون معاند هوانا
طعم الحقيقه ممرر
يعزف موسيقى المواجع
ما قدرنا لحظة نقرر
إيه فينا ضارر ونافع
مصلوبه روحى الشهيدة
فوق بحر واسع ف قلبى
والدنيا صعبه عَنيدة
وخدانا دايما تحدى
كَهف الليالى ساحبى
فوق بحر هايج دموعه
مالقتشى واحد صَاحبنى
والكُل فارد قُلوعه
دورت واحتار دليلى
مالقتشى طعم السعاده
قولت الشهاده سبيلى
والسر جوه العباد
