رضوى راضى
بصوا يا جماعة مش هنعتبر ده مقال هنعتبره قعدة عرب كده نتصالح فيها على بعض علشان نلحق اللي نلحقه بقى..أنا هتكلم بلغة الطرفين فأوصل المعلومة بسهولة و سرعة و اعتبروني من ي الـ Others بتوع الهوت مايل يعني محايدة ماليش دعوة بحد.. مينفعش يا شباب و الله اللي بيحصل بينكم كأولاد و بنات حقيقي اتفضحتوا قدام الجيل الجديد خلاص هيكلوا وشكم ! بقالكم حاجة وعشرين و حاجة و تلاتين سنة ومفهمتوش بعض و دول في 16 17 18 سنة - يتخللهم فترات رضاعة و حضانة و بلاوي زرقا - يفهموا ثغراتكم و حركاتكم و حاجاتكم كده ؟ أنتوا الاتنين غلطانين الموضوع أبسط من البساطة .. صلوا عالنبي :
- بتحبي حمادة وحمادة عمل شير لبوست بيقول "الجواز في العشرينات كترك حفلة قبل منتصف الليل" تتقهري و تزعلي ليه؟ حفلة إيه اللي هو بيتكلم عليها دي ؟ دي الحفلة الوحيدة الي حضرها كانت ل"علي الحجار" في ساقية الصاوي مع بنات خالته! يبقى نفك حمادة وmove on حطي نفسك مكانه,نزلتي تشتري لبس هتدخلي محل واحد أول حاجة عينيك هتقع عليها هتجبيها ؟ ولا هنقيس دي و دي و نشوف لون دي و دي و نقرر ؟ فا كونسبت حمادة إنه يجرب السمرا والبيضا و الرفيعة و التخينة و يقرر برضو! صح أحمادة ؟
- بص بقي يا سيدي قدرك و نصيبك إن ربنا خلقلك مراكز التركيز و الملاحظة في حاجات وحتت معينة هنعترض على قضاء ربنا؟ هنكفر؟ فهتيجي تقولك "بيبي .. مش ملاحظ حاجة متغيرة فيا ؟" لو ملاحظتش حاجة أو جاوبت غلط "ادعوا له الآن فهو يسأل" فخلي فيه سرعة بديهة كده و خدها من ايديها نزلها للعربية و افتح الكبوت و قولها مش ملاحظة أنتي حاجة؟ و طبعاً هترتبك فيه قلب ترابيزة بيحصل تقولها ده أناغيرت الرادياتير طبعاً دي زي ما تقولك أنا غيرت الـ eyelashes shape طبيعي هيحصل error..وبكده عصمة الخناقة دي في ايدك و قضا اخف من قضا يا معلم .
-المسلسل التركي شغال, ترضي طنط تقومك تغسلي المواعين ؟ فخلاص قاعد عالقهوة مع صحابه مترضيهالوش إنه يقوم يروح علشان يسمع اشمعنى نهى خدت حوافز أكتر منك الشهر ده ! خليكي حويطة و نكدي عليه وقت تاني ميكنش متوقعها فيتفاجئ .. أما لو هو اللي نيكادي و دراما كوين فدي فروق فردية وانتي فقرية وخيرها في غيرها أو خدي اسلوب "فرفشني يا ببلاوي" وواحدة واحدة هيفك و بلاش المقارنة الشهيرة بتاعة أنا ولا صحابك ؟ هيعمل فلاش باك لصاحبه الرخم اللي قاله في رابعة ابتدائي سابق ولا لاحق؟ "الفوز مؤكد"و هيربطك بيه و يتقفل منك.
-"أنا تخينة ؟" أو أي صيغة للسؤال ده تصحصح كده علشان ده فخ مش مجرد سؤال..من غير أي تفكير و من غير ما تبصلها تقول بصوت عالي "لأ" خلي لأ دي تخرم طبلة ودنها قبل ما تخرمك هي, و قيس على كده "هي أحلى مني؟" "الشنطة دي أحلى من بتاعتي؟" تقلب عباس الضو و تقولها بقلب جامد أوي من غير تردد "لااااااااء" و بكده تكون وفرت اسبوع قفش و 7 ساعات مصالحة و هديتين .
-مش شوية نقول البنت زي الولد مهييش كمالة عدد تيرارا را و تاخد حقوقها زيها زيه و يومها بالليل يخرجوا و يسيبها تدفع لنفسها فيبقى إزااااي سابها تدفع؟ دي بنت و هو ولد ياخراشي حصل ايه للرجالة؟...و مش هتعمل أسلاك شائكة على أختك و لأ و مينفعش و عيب و انت تصاحب بنات الناس عادي حتى لو هي راضية على نفسها .. مش عادي و عيب عليك و مينفعش و لأ علشان كونك ولد مش شفيع ليك.
أهم حاجة يا جماعة و أنتوا بتختاروا بعض متختاروش اللي هيعملك أو هيعملِك كل حاجة مفيش حاجة اسمها حد Perfect بيتشقلب و مفيهوش غلطة بس فيه حد Perfect ليا يعني هنكمل بعض علشان نتشقلب مع بعض و نعمل كل حاجة, احنا الاتنين هنعافر و احنا الاتنين هنستحمل و احنا الاتنين ناضجين كفاية اننا نحل مشاكلنا سوا من غير تدخل حد من اصحابنا علشان الطبيعي إن صحابك يقولولك "ياسطا نفض كلهم كده"..و طبيعي صحابِك يقولولك "أوف يا توتا ! ده طلعلك حبوب من كتر الخناقات"، فاستهدوا بالله يا جماعة أنتم مالكوش غير بعض و الحقوا نفسكم علشان الاجيال الي طالعة دي هتزعلكم و أبسط دليل على كده إن اللي كاتبة الكلام ده لم تتعدى التاسعة عشر عاماَ, خسئتم.
