فى شم النسيم
راح تشم أحلى نسيم
مع أكلة فسيخ
أحلى من الأكل والطبيخ
الشطة فيه تولع
تقعد تاكل وتدلع
معاها ليمون وبصل وطحينة
يا عينى على المعدة مسكينة
ولا تنسى الخس والملانة
تطرى النفس العطشانة
مع عيش طازة وطرى
بس اوعى تدوس وتفترى
والتسالى ترمس وحمص
والأطفال تقزقز وتهيص
معاها الواحد ينسى همه
ولا حتى الورد تقدر تشمه
وتجيب من واحد مضمون
أحسن تيجى معاك فى الجون
ويجيبك لمس أكتاف
تطلب بعدها الإسعاف
واوعى تكتر منه
أحسن الوعى تغيب عنه
ولا تشرب معاه الميه
تفضل رايح جى على الحنفية
كل ولا تلخبط لخابيط
أحسن تخبط بعدها فى الحيط
واوعى تزيد وتبهدل فى نفسك
والفسيخ يكتم على نفسك
بالراحة شوية وحبة حبة
ولا تخلى حاجة فى نفسك
بس للأسف سعره غالى
وبقى ضارب فى العلالى
ولو أنت مش قادر عليه
ولا حتى ليك خالص فيه
خليك فى الرنجة
يا واش يا واش ودنجا دنجا
ولا تنسى البيض الملون
مع الأطفال تقعد وتلون
شم النسيم مع لمة العيلة
والصحبة حلوة جميلة
بيبقى يوم مش عادى
بس خليك فى الأكل هادى
ولو جات لك حموضة
اشرب لبن رايب أو زبادى
واخرج اركب مركبة فى النيل
أو اتمشى شوية بالليل
والأطفال تركب المراجيح
والناس تعيد من غير تجريح
محتاجين حبة تفاريح
عيد الربيع علينا هل
عيد مليان ورد وفل
عيد سعيد يا رب على الكل
بس اغسل إيدك وبعدين كل
