مفطّراتى.. ماشى بآلاتى
ويّايا طبله.. بانده يا أبله
عنتر يفطّر حبيبته عبله
ويّايا آله.. ماشيه بتكاله
شاعر يا خاله ومغنّواتى
مفطّراتى.. ماشى بآلاتى
بنقول له يالله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
هذا أوانى.. رصّوا الصوانى
صبّوا العصاير من القنانى
«شويكار» هتيجى سيبوا الأغانى
بلّوا الخشافه.. سقّوا الكنافه
بطّل يا عم اسمك ايه سخافه
صوت المنبّه خرم ودانى
عقرب ساعتنا.. عمّال يعانى
ماشى بتأنّى.. وانا غصب عنّى
- ماسك ضلوعى لتفكّ منّى-
لفّيت حوارى.. ساعة العصارى
ومشيت أغنّى فوق الكبارى:
● ● ●
وحّدوه ياللى ابتليتوا
يا اللى هدّيتوا وبنيتوا
ياللى بعد النور ما فتّح
بعتوا أحلامنا ونسيتوا
طبلتى دقّت وقالت
للقلوب اللى استمالت
واللى ساعة الحق مالت
فول وطرشى وتمر طازه
أرضكم من غير حيازه
والغنا طالع مزهزه
والوجع واخد أجازه
رمضنوا من غير ضغاين
سيبوا أرواحكم رهاين
للسماحه وللصراحه
للغنا من غير نواحه
العدو ع الباب مرابط
فوقوا يا أهل الفصاحه
مفطّراتى.. ماشى بآلاتى
ويّايا طبله ومغنّواتى
بنقول له يالله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
تم أضافة تعليقك سوف يظهر بعد المراجعة