مفطّراتى.. ماشى بآلاتى
ويّايا طبله.. بانده يا أبله
عنتر يفطّر حبيبته عبله
ويّايا آله.. ماشيه بتكاله
شاعر يا خاله ومغنّواتى
مفطّراتى.. ماشى بآلاتى
بنقول له يالله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
قوم يا بن خالى.. رصّ الشوالى
قومى يا خضره.. شوفى المقالى
ستّى وأنيستى.. بالليل جليستى
هأفطر وأصلّى وأحرس كنيستى
كيستى ف دولابى.. وانا اسمى حابى
وشّى اخناتونى... واللون آتونى
مصرى وطبيعى.. حرّ وطليعى
وعنيّا شايفه... قلبى الرّبيعى
أخضر بلونها.. حالف يصونها
واقف بسيفه.. حافظ غصونها
مضمونها روحى.. غايتى وطموحى
أجهر بصوتى... وأصرخ ببوحى
بأعشقها آيه.. وأفديها رايه
وأرسمها قاعده تحكى الحكايه
شاعر وصوتى.. كاسر سكوتى
لفّيت حوارى.. ساعة العصارى
ومشيت أغنّى فوق الكبارى
● ● ●
يسعد صباحك يا مصر الساكنه جوّاها
.. أعظم كلام للنديم..... واصف مُحيّاها
تحيانى عيّل بليد.... طارح وطن ونهار
زنهار وواقف عشان تحيانى واحياها
● ● ●
هذا صباح مختلف... هذا الصباح طازه
نفسى أقطفك واحفظك.. جوايا فى قزازه
واعمل عشانك موالدى بدفّ وب بازه
الكلمه فاظه...... وعيونك فيها زايناها
● ● ●
واحشانى لكن...... هاقول لك بعد لكن ياه
ساكنانى وحدك... ووحدك بتكونينى حياه
يسعد صباحك....... وروحى بتبتهل لله
بتغنّى ليها........ وساعات بتغنّى ويّاها
مفطّراتى.. ماشى بآلاتى
ويّايا طبله ومغنّواتى
بنقول له يا الله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
