شقة وغرفتين فاضيين
وليل بيمر زى الصخر مش بيلين
وسرير بلحاف ودفاية
لكن لسه الكفوف باردين
وصوت الصمت فى الغرفة
واضح من ساعات الحيط
كأن القطر بيحَّضر
ياخدنى لذكريات وحنين
ركبت بسرعة رحلة صمت جوايا
غمضت عيونى وقت أقل من ثانية
فتحت لقيتنى مش موجود على سريرى
محطات الذكريات مرت قصاد عينى
وخدنى القطر للماضى
مكان أول ما كنت تملى بستنى
وشفت بعينى وأنا واقف مع أصحابى
وهى كمان بتتكلم مع أصحابها
وكانت بينا فى نظرات
بتهرب من بعيد لبعيد
وأصعب حاجة فى العبارات
وصف التعبيرات بسعيد
لقتنى بجرى أكلمنى وأقولى بلاش
يا واد افهم هتظلمنى فى عمرى الجاى
لكنى مكنش سامعنى
وأنا بغرق فى عزف الناى
تم أضافة تعليقك سوف يظهر بعد المراجعة