مفطّراتى.. ماشى بآلاتى
ويّايا طبله.. بانده يا أبله
عنتر يفطّر حبيبته عبله
ويّايا آله.. ماشيه بتكاله
شاعر يا خاله ومغنّواتى
مفطّراتى.. ماشى بآلاتى
بنقول له يا الله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
سمّاك ودُورى.. ترويض صقورى
ويّايا بلطى وقشور وبورى
صيد النهارده... يا عيون يا شارده
مفروده إيدى.. ليكم وفارده
كفّ السلامه... رحمه ورحامه
يا رب سلّم... من القيامه
فوق راس بلدنا.. حطّت حمامه
نشوان وماشى... بانده غباشى
ليه قالوا هتلر النازى فاشى؟
حمدى ابن سوكه.. باع الفلوكه
بالأمس داست فى رجلى شوكه
رُحت بصراحه.. للخال نصاحه
قال لى بتأنى.. محتاج جراحه
طلّع ساطوره.. ولّع وابوره
وانا وشّى فلّق من التناحه
يا عمّ نصحى.. فوّق سماحه
أيام مباركه.. وجِمالنا باركه
وإيدينا تاركه... فاس الفلاحه
يا رب عدّل... الحال وبدّل
يا صوت مخدّل.. الندل ندّل
واندار وخلّص على السياحه
هذا أوانى.. والخير مساحه
لفّيت حوارى.. ساعة العصارى
ومشيت أغنّى فوق الكبارى:
............
من عند بيت القاضى طالع موكب الرؤيه
طار الحمام الزاجلى ينادى
دايره السواقى وساقيه من ساقيه
عاشت بلادى وعاش هوا بلادى
مصر الوحيده اللى من قبل التاريخ باقيه
رمضان كريم
شدوا حيلكوا عشانها يا ولادى
..............
مفطّراتى.. ماشى بآلاتى
ويّايا طبله ومغنّواتى
بنقول له يا الله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
