احلم يا فقير
أنك بتطير زى العصافير
أحلم أنك بيه أو باشا
وانك تملك ياما فلوس
وأنك راكب عربية فى شارع فاضى
وعلى البنزين بتدوس
احلم أنك
عايش لسه فى دنيا السحر
وأنك وأنت فى قلب حكاية
زى حكاية الشاطر .
والرحالة وعلاء الدين
الحظ ضحكلك
وفجأة طلعلك
مارد من قلب فانوس
قالك أؤمر
قلتله الأول احنى وميل
احضن يا أصيل واحيى وابوس
واحلم أنك صاحب أعمال
وأنك بتصيف يا فقير فى مارينا
أحلم يمكن حلمك
يبعد عنك دمعة حزينة .
احلم أنك مشهور معروف بالاسم
وأنك أنت البيه مأمور القسم
واحلم أنك
أنت لأنك
بس مواطن
داخل عادى مبنى محافظة بلدك
داخل عادى تخلص ورقك
وتخلص وتروح مشوارك
وأنت مروح تاخد فى ايدك
حبة فاكهة
وحتة لحمة تعشى عيالك
احلم . احلم .
يمكن حلمك يقلب جد
أنت أصلك يا فقير مصرى
والمصرى أحسن من أيه حد
احلم يا فقير . .
