تضحيات كبيرة قدمتها جميلة (نيللي كريم) لجوزها هشام (أحمد فهمي) في مسلسل لأعلى سعر، وكانت النتيجة إنه "عينه زاغت " على واحدة تانية لما الفلوس جريت في إيده وبقى مشهور، ومن وحي تجربة جميلة هناك 7 نصائح قبل ما تبدأي حياتك الزوجية عشان مترجعيش تندمي زيها من وحي المسلسل :
1- حافظي على شغلك بعد الجواز
جميلة أول ما جوزها طلب منها تسيب الباليه، اتخلت عن حلمها وموهبتها وسابت الباليه وقعدت في البيت والنتيجة أنها تخنت وفقدت بريقها، والندل أول ما القرش جري في إيده دور على الست الحلوة.
2- احسبيها بعقلك
ولأن الجواز مشروع طويل المدى – المفروض يعني – فلازم تفكري فيه بعقلك كمان مش قلبك بس، فكري هل الشخص ده مناسب ليكي اجتماعياً؟ هو اللي هتحققي معاه أحلامك؟ هل مع أول مشكلة هيتغير وتبقى العلاقة كلها مشاكل؟
3- اهتمي بنفسك
الرجالة بتروح وتيجي، اللي فاضل لك هو السيلوليت والدوالي والعوامة على بطنك لو أهملتي في نفسك. جميلة ركزت بس في بيتها وجوزها، وكانت النتيجة إنه اتجوز عليها صاحبتها.
4- القفة أم ودنين.. يشيلها لوحده
لما كانت جميلة في وضع اجتماعي أعلى من جوزها، كانت طموحة أنها تتنقل هي وجوزها لوضع اجتماعي أفضل، اشترت شقة جديدة واسعة عشان تخصص جزء منها عيادة له، ويا عالم بعد ما طردته من الشقة اللي باسمه هيكون رد فعله إيه أول ما يقلب عليها، عشان كده لازم تفصلي فلوسك عن فلوسه ولو جبتيله حاجة دفعيه تمنها كمان.
5- لو ليكي صاحبة مُزة؛ بلكيها
ولأن بطبعه بصباص، ودي حاجة مش بإيدك تغيريها فالأفضل أنك متعرفيهوش على أصحابك، ليه؟ عشان لما يخونك متبقيش خسرتي صاحبتك وجوزك في نفس الوقت وتلاقي حد تشتمي جوزك معاه.
6- اكتمي على نفسه
لو سبتي لجوزك مساحة الحرية الشخصية هيتفرد وينطلق ويمشي براحته، فالأفضل أنك تكتمي على نفسه ومتخليهوش ياخد فرصة يبص تحت رجله، صحيح ده مش هيمنعه أنه برضة يخونك، لكن على الأقل هيكون متزاول في كل لحظة ومش هتهنيه على لحظة حلوة لأنه هيكون بيفكر أنه هتقفشيه دلوقتي.
7- البعد عن الرجال غنيمة
طبعاً النصائح اللي فوق دي كلها لو أنت حابة تخوضي التجربة وترتبطي براجل، لكن النصيحة الأهم هي أنك تبعدي عن الرجالة كلهم ومتتعبيش نفسك بالتفكير في كل اللي قلناه فوق وتعيشي حياتك كسترونج إندبندنت وومان، لأنك لما تعرفي الرجالة هتكتشفي إن ده أحسن لك.
